លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានចុះអញ្ជើញជួបសំណេះសំណាល និងសួរសុខទុក្ខដោយផ្ទាល់ជាមួយភរិយា និងគ្រួសារកងការពារព្រំដែនលេខ៥០៣ និងលេខ៥១៣ ក្នុងខេត្តបន្ទាយមានជ័យនា ថ្ងៃទី០២ ខែវិច្ឆិកា ឆ្នាំ២០២៦។
ក្នុងឱកាសនោះ លោកជំទាវកិត្តិបណ្ឌិតរដ្ឋមន្ត្រី បាននាំយកសារសួរសុខទុក្ខ និងការយកចិត្តទុកដាក់ខ្ពង់ខ្ពស់ពី សម្តេចតេជោ ហ៊ុន សែន ប្រធានព្រឹទ្ធសភា និង សម្តេចធិបតី ហ៊ុន ម៉ាណែត នាយករដ្ឋមន្ត្រី ជូនដល់គ្រួសារវីរកងទ័ព ព្រមទាំងបានចែកជូននូវស្បៀងអាហារ សម្ភារប្រើប្រាស់ និងថវិកាឧបត្ថម្ភពីអង្គការនគរទេព ដើម្បីជួយសម្រាលការលំបាក និងលើកទឹកចិត្តដល់ពួកគេ។
លោកជំទាវកិត្តិបណ្ឌិតបានសម្តែងនូវការដឹងគុណយ៉ាងជ្រាលជ្រៅចំពោះការលះបង់របស់កងកម្លាំងការពារព្រំដែន ព្រមទាំងសរសើរគំរូវីរៈភាពរឹងមាំ និងការលះបង់ដោយស្ងៀមស្ងាត់របស់ភរិយាកងទ័ព ក្នុងការមើលថែគ្រួសារយ៉ាងល្អប្រសើរអំឡុងពេលស្វាមីបំពេញបេសកកម្មជូនជាតិ។ លោកជំទាវបានគូសបញ្ជាក់ថា សន្តិភាព និងការអភិវឌ្ឍជាតិ មិនអាចកាត់ផ្តាច់ពីការលះបង់របស់កងទ័ព និងការគាំទ្រពីគ្រួសារបានឡើយ។
ជាមួយគ្នានេះ លោកជំទាវរដ្ឋមន្ត្រីក៏បានលើកទឹកចិត្តឲ្យស្ត្រី និងគ្រួសារកងទ័ព បន្តរពង្រឹងសាមគ្គីភាព និងខិតខំបង្កើនមុខរបរគ្រួសារបន្ថែមទៀត។ ជំនួបនេះបានស្តែងឲ្យឃើញយ៉ាងច្បាស់ពីការយកចិត្តទុកដាក់យ៉ាងយកចិត្តទុកដាក់របស់រាជរដ្ឋាភិបាល និងក្រសួងកិច្ចការនារី ចំពោះសុខុមាលភាព និងជីវភាពរស់នៅរបស់គ្រួសារកងទ័ពការពារជាតិ៕ ដោយ៖ ប៉ៃ សុឃីម
