ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិថ្ងៃទី៤ ខែវិច្ឆិកា ឆ្នាំ២០២៦ បានអញ្ជើញចូលរួមកិច្ចប្រជុំរដ្ឋមន្ត្រីការបរទេសមេគង្គ-ឡានឆាង លើកទី១១ នៅរដ្ឋធានីប៉េកាំង សាធារណរដ្ឋប្រជាមានិតចិន ក្រោមមូលបទ «ពង្រឹងការកសាងសហគមន៍ដែលមានជោគវាសនារួម៖ ការចាប់ផ្តើមជំពូកថ្មី សម្រាប់មេគង្គ-ឡានឆាង ២.០»។ កិច្ចប្រជុំនេះផ្តោតលើការកំណត់ទិសដៅ និងជំរុញកិច្ចសហប្រតិបត្តិការរវាងប្រទេសសមាជិកឱ្យកាន់តែស៊ីជម្រៅក្នុងដំណាក់កាលថ្មី។
ក្នុងឱកាសនោះ ឯកឧត្តមឧបនាយករដ្ឋមន្ត្រី ប្រាក់ សុខុន បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ភាគីពាក់ព័ន្ធទាំងអស់ ក្នុងការជំរុញសមាហរណកម្មអនុតំបន់ កំណើនសេដ្ឋកិច្ច និងការអនុវត្តកិច្ចសហប្រតិបត្តិការជាក់ស្តែង ក្រោមក្របខណ្ឌមេគង្គ-ឡានឆាង (MLC) ក្នុងរយៈពេលមួយទសវត្សរ៍កន្លងមក។ ឯកឧត្តមក៏បានបញ្ជាក់ពីជំហររបស់កម្ពុជាក្នុងការបន្តចូលរួមយ៉ាងសកម្ម ដើម្បីធានាថាដំណាក់កាលមេគង្គ-ឡានឆាង ២.០ នឹងបង្កើតលទ្ធផលជាក់ស្តែង និងឆ្លើយតបទៅនឹងតម្រូវការរបស់ប្រជាជនក្នុងតំបន់។
ជាមួយគ្នានេះ កម្ពុជាបានលើកឡើងពីអាទិភាពសំខាន់ៗចំនួនបួនសម្រាប់ការជំរុញកិច្ចសហប្រតិបត្តិការនាពេលខាងមុខ រួមមាន ការរក្សាសន្តិភាព និងស្ថិរភាព ការគ្រប់គ្រងធនធានទឹកប្រកបដោយការទទួលខុសត្រូវ ការបង្កើនកិច្ចសហការប្រយុទ្ធប្រឆាំងឧក្រិដ្ឋកម្មឆ្លងដែន និងការពង្រឹងទំនាក់ទំនងរវាងប្រជាជននិងប្រជាជន។ អាទិភាពទាំងនេះត្រូវបានចាត់ទុកថាជាមូលដ្ឋានសំខាន់ក្នុងការកសាងសហគមន៍មេគង្គ-ឡានឆាង ដែលមានសន្តិភាព ស្ថិរភាព និងការអភិវឌ្ឍប្រកបដោយចីរភាព ព្រមទាំងនាំមកនូវផលប្រយោជន៍រួមដល់ប្រជាជននៃប្រទេសសមាជិក។
កិច្ចប្រជុំរដ្ឋមន្ត្រីការបរទេសមេគង្គ-ឡានឆាង មានសារៈសំខាន់ក្នុងការពង្រឹងទំនាក់ទំនងមិត្តភាព ការជឿទុកចិត្ត និងភាពជាដៃគូរវាងប្រទេសតាមដងទន្លេមេគង្គ និងប្រទេសចិន។ វេទិកានេះផ្តល់ឱកាសឱ្យប្រទេសសមាជិកពិភាក្សា ផ្លាស់ប្តូរទស្សនៈ និងស្វែងរកដំណោះស្រាយរួមចំពោះបញ្ហាប្រឈមក្នុងតំបន់ ព្រមទាំងកំណត់ទិសដៅកិច្ចសហប្រតិបត្តិការដែលឆ្លើយតបនឹងតម្រូវការជាក់ស្តែងរបស់ប្រជាជន។
ជាពិសេស កិច្ចសហប្រតិបត្តិការក្រោមក្របខណ្ឌមេគង្គ-ឡានឆាង អាចរួមចំណែកជំរុញការតភ្ជាប់ហេដ្ឋារចនាសម្ព័ន្ធ ការដឹកជញ្ជូន ពាណិជ្ជកម្ម ការវិនិយោគ កសិកម្ម ថាមពល និងការអភិវឌ្ឍធនធានមនុស្ស។ ទន្ទឹមនឹងនេះ ការគ្រប់គ្រងធនធានទឹកប្រកបដោយចីរភាព ការចែករំលែកព័ត៌មាន និងបទពិសោធន៍ ព្រមទាំងការឆ្លើយតបរួមចំពោះគ្រោះមហន្តរាយធម្មជាតិ នឹងជួយលើកកម្ពស់សន្តិសុខទឹក ស្បៀង និងថាមពលក្នុងអនុតំបន់។
លើសពីនេះ ការពង្រឹងកិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន ដូចជា ការជួញដូរមនុស្ស ការឆបោកតាមប្រព័ន្ធបច្ចេកវិទ្យា និងបទល្មើសឆ្លងព្រំដែនផ្សេងៗ នឹងជួយលើកកម្ពស់សន្តិសុខ និងសុវត្ថិភាពសម្រាប់ប្រជាពលរដ្ឋ។ សម្រាប់កម្ពុជា កិច្ចសហប្រតិបត្តិការនេះជាឱកាសដ៏មានតម្លៃក្នុងការពង្រីកទីផ្សារ ទាក់ទាញការវិនិយោគ បង្កើនឱកាសការងារ និងជំរុញការអភិវឌ្ឍសេដ្ឋកិច្ចសង្គម ដើម្បីលើកកម្ពស់ជីវភាពប្រជាពលរដ្ឋឱ្យកាន់តែប្រសើរឡើង៕
អត្ថបទដោយ៖ សុភ័ក្រ្ត
