តម្លៃប្រេងឆៅលើទីផ្សារអន្តរជាតិបានធ្លាក់ចុះយ៉ាងខ្លាំងរហូតដល់កម្រិតទាបបំផុតក្នុងរយៈពេលជាច្រើនសប្តាហ៍ ការប្រែប្រួលជញ្ជីងសេដ្ឋកិច្ចនេះ កើតឡើងបន្ទាប់ពីលទ្ធផលនៃការបោះឆ្នោតពាក់កណ្តាលអាណត្តិនៅសហរដ្ឋអាមេរិក បានបង្កើនការរំពឹងទុកថា នឹងមានសម្ពាធផ្នែកនយោបាយកាន់តែខ្លាំងលើលោកប្រធានាធិបតី ដូណាល់ ត្រាំ ឱ្យបញ្ចប់សង្គ្រាមជាមួយអ៊ីរ៉ង់។
តម្លៃប្រេងឆៅប្រភេទ Brent បានធ្លាក់ចុះក្រោម ៩៥ ដុល្លារក្នុងមួយបារ៉ែល ខណៈដែលប្រេងឆៅអាមេរិក West Texas Intermediate (WTI) បានរក្សាតម្លៃនៅត្រឹមប្រមាណ ៨៨ ដុល្លារ ក្នុងមួយបារ៉ែល។
តាមតម្លៃទីផ្សារនៅពេលដែលរបាយការណ៍នេះបានលើកឡើង ការធ្លាក់តម្លៃយ៉ាងគំហុកនេះ បានរុញច្រានតម្លៃប្រេង Brent ឱ្យធ្លាក់ចុះដល់កម្រិតទាបបំផុតក្នុងរយៈពេល ២ ខែ និងប្រេង WTI ដល់កម្រិតទាបបំផុតក្នុងរយៈពេលប្រមាណ ១ ខែ ដោយសន្ទស្សន៍ប្រេងទាំងពីរនេះ បានបាត់បង់តម្លៃប្រមាណ ១៦% និង ១៥% គិតចាប់ពីដើមសប្តាហ៍នេះ។
តម្លៃប្រេងឆៅក៏កាន់តែធ្លាក់ចុះបន្ថែមទៀត ដោយសារការនាំចេញប្រេងចេញពីតំបន់ឆ្នេរសមុទ្រពែក្ស បានចាប់ផ្តើមស្តារឡើងវិញជាបណ្តើរៗ ដែលធ្វើឱ្យការផ្គត់ផ្គង់កើនឡើង៕ អត្ថបទ៖ រិទ្ធី
