នៅថ្ងៃទី២៧ ខែតុលា ព្រះករុណាព្រះបាទ នរោត្តម សីហមុនី ព្រះមហាក្សត្រកម្ពុជា បានឡាយព្រះហស្តលេខាលើព្រះរាជក្រឹត្យ ផ្តល់សញ្ជាតិខ្មែរដល់លោក Jon F. Morgan ស្ថាបនិក «គ្លីនិកលើបឹង» (The Lake Clinic Cambodia) និងអនុញ្ញាតឱ្យលោកប្រើឈ្មោះ «Morgan Karuna»។ ព្រះរាជក្រឹត្យបញ្ជាក់ថា ឈ្មោះដើមរបស់លោកគឺ MORGAN JON FRANCIS ហើយសញ្ជាតិដើមរបស់លោកគឺអាមេរិក។
ចំណងរបស់លោក Morgan ជាមួយកម្ពុជាបានចាប់ផ្តើមនៅឆ្នាំ១៩៩៤។ យោងតាមឯកសាររបស់គណៈកម្មាធិការសហប្រតិបត្តិការដើម្បីកម្ពុជា (CCC) លោកនិងភរិយាបានមកដល់កម្ពុជាក្នុងឆ្នាំនោះ ហើយពេលធ្វើដំណើរតាមទូកទៅខេត្តសៀមរាប ពួកគាត់បានឃើញការលំបាកក្នុងជីវភាពរបស់ប្រជាពលរដ្ឋដែលរស់នៅលើទឹកនៃបឹងទន្លេសាប។ ចាប់ពីឆ្នាំ១៩៩៨ ដល់ឆ្នាំ២០០៧ លោកបានបម្រើការជានាយកប្រតិបត្តិដំបូងនៃមន្ទីរពេទ្យកុមារអង្គរ នៅខេត្តសៀមរាប។
ក្នុងអំឡុងពេលកាន់តួនាទីនេះ លោក Morgan បានចាប់ផ្តើមយកចិត្តទុកដាក់លើតម្រូវការថែទាំសុខភាពរបស់ភូមិបណ្តែតទឹកដាច់ស្រយាល ហើយនៅឆ្នាំ២០០២ លោកបានសហការជាមួយធនាគារអភិវឌ្ឍន៍អាស៊ី ដើម្បីនាំសេវាសុខាភិបាលទៅកាន់ភូមិមួយចំនួន។ តាមរយៈនេះ លោកបានយល់ថា ការពិនិត្យព្យាបាលដោយឥតគិតថ្លៃម្តងម្កាល មិនអាចបំពេញតម្រូវការថែទាំសុខភាពរយៈពេលវែងរបស់ប្រជាពលរដ្ឋបានឡើយ។ បន្ទាប់ពីចាកចេញពីមន្ទីរពេទ្យនៅឆ្នាំ២០០៧ លោកបានបង្កើត «គ្លីនិកលើបឹង» ដើម្បីបម្រើសហគមន៍លើទឹកដែលពិបាកធ្វើដំណើរ និងខ្វះខាតធនធានសុខាភិបាល។
ក្រុមគ្រូពេទ្យរបស់គ្លីនិកធ្វើដំណើរតាមទូកទៅកាន់ភូមិនានា ដើម្បីផ្តល់ការពិនិត្យព្យាបាលមូលដ្ឋានសម្រាប់មនុស្សពេញវ័យនិងកុមារ ការចាក់វ៉ាក់សាំង សេវាព្យាបាលធ្មេញនិងភ្នែក ការពិនិត្យផ្ទៃពោះមុនសម្រាល និងការអប់រំសុខភាព។ នៅពេលចាំបាច់ ក្រុមគ្រូពេទ្យក៏ជួយបញ្ជូនអ្នកជំងឺទៅទទួលការព្យាបាលបន្ត និងរៀបចំមធ្យោបាយធ្វើដំណើរផងដែរ។
យោងតាមរបាយការណ៍ការងារប្រចាំឆមាសទីមួយ ឆ្នាំ២០២៦ ដែលលោក Morgan បានផ្សព្វផ្សាយនៅលើវេទិកា GlobalGiving ក្នុងចំណោមភូមិបណ្តែតទឹកចំនួន៩ ដែលគ្លីនិកបម្រើ ភូមិដែលនៅជិតកំពង់ផែបំផុតមានចម្ងាយប្រមាណ៣០គីឡូម៉ែត្រ រីឯភូមិដែលនៅឆ្ងាយបំផុតមានចម្ងាយប្រមាណ១០០គីឡូម៉ែត្រ។ ថ្លៃធ្វើដំណើរក៏ជាឧបសគ្គមួយសម្រាប់គ្រួសារក្រីក្រក្នុងការទៅទទួលសេវាព្យាបាល។ ចាប់ពីខែមករា ដល់ខែមិថុនា ឆ្នាំនេះ គ្លីនិកបានចុះផ្តល់សេវាចំនួន១៨៦លើក ផ្តល់សេវាដល់អ្នកជំងឺសរុប៦២១០លើក និងជួយបញ្ជូនអ្នកជំងឺ២៦នាក់ទៅកាន់ស្ថាប័នសុខាភិបាលកម្រិតខ្ពស់ជាង។
គេហទំព័រផ្លូវការរបស់ «គ្លីនិកលើបឹង» បង្ហាញថា ចាប់តាំងពីឆ្នាំ២០០៧ អង្គការនេះបានផ្តល់សេវាសុខភាពដោយឥតគិតថ្លៃសរុបជាង៣៦ម៉ឺនលើក។