រដ្ឋសភានៃកម្ពុជា និងសាធារណរដ្ឋកូរ៉េ បានឯកភាពគ្នាបន្តពង្រឹងកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅលើការគ្រប់គ្រងធនធានទឹក បរិស្ថាន និងការប្រែប្រួលអាកាសធាតុ ព្រមទាំងបានសម្តែងការគាំទ្រយ៉ាងពេញទំហឹងចំពោះគំនិតផ្ដួចផ្ដើម «គម្រោងផ្លាស់ប្តូរវប្បធម៌ និងទេសចរណ៍ ២០-៣០» ដើម្បីត្រៀមរៀបចំព្រឹត្តិការណ៍អបអរសាទរខួបលើកទី៣០ នៃការបង្កើតទំនាក់ទំនងការទូតឡើងវិញរវាងប្រទេសទាំងពីរ នៅឆ្នាំ២០២៧ ខាងមុខ។
នេះបើយោងតាមជំនួបពិភាក្សាការងារ រវាង ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាននៃរដ្ឋសភាកម្ពុជា ជាមួយលោកជំទាវ Han Jeoung-ae ប្រធានក្រុមប្រឹក្សាសភាទឹក និងអាកាសធាតុអាស៊ី-ប៉ាស៊ីហ្វិក (APWCC) កាលពីថ្ងៃទី៩ ខែវិច្ឆិកា ឆ្នាំ២០២៦ នៅវិមានរដ្ឋសភានៃសាធារណរដ្ឋកូរ៉េ។
លោកជំទាវ Han Jeoung-ae បានសម្តែងការគាំទ្រយ៉ាងខ្លាំងចំពោះគំនិតផ្ដួចផ្ដើម «គម្រោងផ្លាស់ប្តូរវប្បធម៌ និងទេសចរណ៍ ២០-៣០» ដោយចាត់ទុកថាជាស្ពានមិត្តភាពដ៏មានអត្ថន័យជ្រាលជ្រៅក្នុងការជំរុញការផ្លាស់ប្តូររវាងប្រជាជន និងប្រជាជន។
គម្រោងនេះបង្កប់នូវអត្ថន័យជាប្រវត្តិសាស្ត្រ ដោយតួលេខ «២០» សំដៅដល់ខួប ២០ឆ្នាំ នៃទំនាក់ទំនងជាប្រវត្តិសាស្ត្ររវាងអរិយធម៌ស៊ីលឡា (Silla) និងអរិយធម៌អង្គរ ចាប់តាំងពីឆ្នាំ២០០៦ មក ខណៈតួលេខ «៣០» តំណាងឱ្យព្រឹត្តិការណ៍ជាប្រវត្តិសាស្ត្រនៃការប្រារព្ធខួបលើកទី៣០ នៃការបង្កើតទំនាក់ទំនងការទូតឡើងវិញរវាងកម្ពុជា និងសាធារណរដ្ឋកូរ៉េ នៅឆ្នាំ២០២៧។
ជាមួយគ្នានោះ ឯកឧត្តម សួស យ៉ារ៉ា បានលើកឡើងពីលទ្ធផលនិងបទពិសោធន៍ដ៏ល្អប្រសើរនៃការសិក្សាស្រាវជ្រាវដែលសាជីវកម្មធនធានទឹកកូរ៉េ (K-water) ធ្លាប់បានអនុវត្តនៅតំបន់ទន្លេមេគង្គខាងលើ ដែលជាសក្តានុពលដ៏សំខាន់សម្រាប់ការពង្រីកកិច្ចសហប្រតិបត្តិការបច្ចេកទេសឱ្យកាន់តែទូលំទូលាយ។
ភាគីទាំងពីរបានពិភាក្សាលម្អិតលើការការពារប្រព័ន្ធអេកូឡូស៊ីនៅតំបន់ទន្លេមេគង្គ ការដោះស្រាយបញ្ហាទឹកជំនន់ក្នុងរដូវវស្សា និងការខ្វះខាតទឹកក្នុងរដូវប្រាំង ព្រមទាំងការចែករំលែកបច្ចេកវិទ្យា និងចំណេះដឹងវិទ្យាសាស្ត្រទំនើបៗ។
ជាការឆ្លើយតប លោកជំទាវប្រធាន APWCC បានគូសបញ្ជាក់ពីការប្តេជ្ញាចិត្តក្នុងការប្រើប្រាស់យន្តការនៃក្រុមប្រឹក្សាសភាទឹក និងអាកាសធាតុអាស៊ី-ប៉ាស៊ីហ្វិក ដើម្បីបន្តគាំទ្រកម្ពុជាក្នុងការដោះស្រាយរាល់បញ្ហាប្រឈមទាក់ទងនឹងការគ្រប់គ្រងធនធានទឹក និងការប្រែប្រួលអាកាសធាតុ សំដៅធានានូវចីរភាពបរិស្ថាន និងការអភិវឌ្ឍប្រកបដោយចីរភាពសម្រាប់ផលប្រយោជន៍រួមនៃប្រទេសទាំងពីរ៕ ដោយ៖ ស្រីពី
