គណៈប្រតិភូរដ្ឋសភាកម្ពុជានាពេលថ្មីៗនេះបានបដិសេធយ៉ាងម៉ឺងម៉ាត់ចំពោះសេចក្តីរាយការណ៍របស់កាសែតថៃ The Nation ដោយច្រានចោលការអះអាងថា កម្ពុជាបាន «ឃុបឃិត» ជាមួយចិន នៅមហាសន្និបាតលើកទី១៥១ នៃសហភាពអន្តរសភា (IPU) ដើម្បីផាត់ថៃចេញពីគណៈកម្មការតាក់តែងសេចក្តីព្រាង។ ភាគីកម្ពុជាបាននិយាយថា សេចក្តីរាយការណ៍នោះ «បំភ្លៃការពិត និងបំភាន់មតិសាធារណៈ» ហើយធ្វើឱ្យខូចខាតយ៉ាងធ្ងន់ធ្ងរដល់រូបភាពកម្ពុជាលើឆាកអន្តរជាតិ។
តាមការរាយការណ៍របស់ The Nation នៅមហាសន្និបាត IPU ក្នុងទីក្រុងហ្សឺណែវ ប្រទេសស្វីស ក្រុមអាស៊ី–ប៉ាស៊ីហ្វិកត្រូវបានផ្តល់អាសនៈចំនួន២ក្នុងគណៈកម្មការតាក់តែងសេចក្តីព្រាងសេចក្តីសម្រេច។ កម្ពុជាត្រូវបានតែងតាំងជាអនុប្រធាន ចិនជាប្រធាន ចំណែកគណៈប្រតិភូថៃមានតួនាទីជា «ទីប្រឹក្សា» ដោយគ្មានសិទ្ធិបោះឆ្នោត។
អ្នកនាំពាក្យគណៈប្រតិភូកម្ពុជាបានឆ្លើយតបថា ការអះអាងនេះ «មិនពិតទាំងស្រុង»។ កម្ពុជាត្រូវបានជ្រើសតាំងចូលគណៈកម្មការជាផ្លូវការ ក្រោយទទួលការយល់ព្រមជាឯកច្ឆន្ទពីសមាជិកទាំងអស់នៃក្រុមអាស៊ី–ប៉ាស៊ីហ្វិក ហើយមិនបានផាត់តំណាងប្រទេសណាមួយចេញឡើយ។ អ្នកនាំពាក្យបាននិយាយថា «យើងតែងប្រកាន់ខ្ជាប់គោលការណ៍ស្មើភាព យុត្តិធម៌ និងកិច្ចសហប្រតិបត្តិការ»។
ភាគីកម្ពុជាបានពន្យល់ថា សមាជិកភាព និងតំណែងប្រធាននៃគណៈកម្មការ IPU ត្រូវបានកំណត់តាមការពិគ្រោះយោបល់របស់ក្រុមភូមិសាស្ត្រនយោបាយទាំង៦ និងទទួលការបញ្ជាក់ពីប្រធាន និងលេខាធិការដ្ឋាន។ ការមានសិទ្ធិបោះឆ្នោតឬអត់របស់ប្រទេសដែលដាក់សេចក្តីព្រាង អាស្រ័យលើនីតិវិធីតែងតាំងផ្លូវការរបស់ក្រុមនីមួយៗ។
អ្នកនាំពាក្យបានសង្កត់ធ្ងន់នៅចុងក្រោយថា កម្ពុជាតែងប្តេជ្ញាជំរុញការសន្ទនាអន្តរជាតិ និងកិច្ចសហប្រតិបត្តិការតំបន់ ជាពិសេសការប្រយុទ្ធប្រឆាំងឧក្រិដ្ឋកម្មឆ្លងដែន និងការឆបោកតាមអនឡាញ។ «ការរាយការណ៍មិនពិតមិនត្រឹមតែប៉ះពាល់រូបភាពកម្ពុជាទេ ប៉ុន្តែក៏មិនជួយដល់កិច្ចសហប្រតិបត្តិការ និងទំនុកចិត្តរវាងប្រទេសនានាដែរ»។
ស្ថានីយចងក្រងសេចក្តីរាយការណ៍
