វត្តច័ន្ទស៊ីសាមគ្គីរតនារាម ក្នុងឃុំកូប ស្រុកអូរបីជាន់ ខេត្តបន្ទាយមានជ័យ ត្រូវបានប្រើជាទីជម្រកបណ្តោះអាសន្នសម្រាប់ជនភៀសសឹកជិត ៥០០គ្រួសារ ដែលបានជម្លៀសចេញពីតំបន់ព្រំដែន បន្ទាប់ពីកើតមានការបាញ់ប្រហារពីសំណាក់ទាហានថៃ កាលពីថ្ងៃទី ១២ ខែវិច្ឆិកា ឆ្នាំ ២០២៥។
គិតត្រឹមយប់ថ្ងៃទី ១៤ ខែវិច្ឆិកា ជនភៀសសឹករាប់រយនាក់កំពុងស្នាក់នៅក្រោមដំបូលវត្ត ដោយទទួលបានជំនួយពីអាជ្ញាធរ និងសប្បុរសជន។ ពួកគេទាំងនេះមកពីភូមិដែលមានហានិភ័យខ្ពស់ រួមមាន ភូមិព្រៃចាន់, ជោគជ័យ, បន្ទាយថ្មី, ប្រាសាទ, អូរបីជាន់ និងភូមិចំការគ ក្នុងស្រុកស្វាយចេក។
ហេតុការណ៍បាញ់ប្រហារនោះ បានបណ្ដាលឱ្យប្រជាពលរដ្ឋខ្មែរម្នាក់ស្លាប់ និងបីនាក់រងរបួសនៅភូមិព្រៃចាន់ ទោះបីជាក្នុងថ្ងៃទី ១៣ និង ១៤ មិនមានការផ្ទុះអាវុធឡើងវិញក៏ដោយ ក៏តំបន់ព្រំដែននៅតែមានការប្រុងប្រយ័ត្នខ្ពស់។ ប្រជាពលរដ្ឋនៅភូមិព្រៃចាន់ត្រូវបានជម្លៀសចេញទាំងស្រុង ខណៈដែលនៅភូមិជោគជ័យ មានមនុស្សខ្លះនៅតែស្នាក់នៅ ដើម្បីតាមដានស្ថានភាពបន្ត។
ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានឲ្យដឹងថា អាជ្ញាធរខេត្តកំពុងព្យាយាមដោះស្រាយបញ្ហារបស់ជនភៀសសឹកយ៉ាងសកម្ម។ លោកបានលើកឡើងថា៖ «មានប្រជាពលរដ្ឋជិត ៥០០ គ្រួសារ កំពុងស្នាក់នៅក្នុងវត្តច័ន្ទស៊ី។ អាជ្ញាធរខេត្តបានរៀបចំកន្លែងស្នាក់នៅ ផ្តល់សម្ភារៈចាំបាច់ និងស្បៀងអាហារ ដើម្បីធានាសុខុមាលភាពរបស់បងប្អូន។ រាជរដ្ឋាភិបាលនឹងបន្តគាំទ្រដល់អ្នករងគ្រោះទាំងអស់ក្នុងឱកាសដ៏មានភាពរអាក់រអួលនេះ»។
ជនភៀសសឹកបានបង្ហាញការដឹងគុណចំពោះជំនួយរហ័សរហួននេះ។ ពលរដ្ឋម្នាក់ពីភូមិព្រៃចាន់ បញ្ជាក់ថា ពួកគេមានការភ័យខ្លាចខ្លាំងនៅពេលកើតហេតុ ប៉ុន្តែបានមានអារម្មណ៍សុខចិត្តឡើងវិញ នៅពេលអាជ្ញាធររៀបចំកន្លែងស្នាក់នៅ និងផ្គត់ផ្គង់ស្បៀងភ្លាមៗ។
បច្ចុប្បន្ន វត្តច័ន្ទស៊ីសាមគ្គីរតនារាម ក្លាយជាទីកន្លែងសម្រាប់រង់ចាំ និងសង្ឃឹមរបស់ជនភៀសសឹក។ ពួកគេចង់ឲ្យស្ថានការណ៍តាមព្រំដែនធូរស្រាល និងស្ងប់ស្ងាត់ឡើងវិញ ដើម្បីអាចត្រឡប់ទៅផ្ទះ និងបន្តជីវភាពធម្មតារបស់ខ្លួន។
ដោយ៖ ទូរទស្សន៍ខេត្តព្រះសីហនុ
