អ្នកល្បីបណ្តាញសង្គមចិនបាត់ទំនាក់ទំនង ក្រោយមកព្រះសីហនុជួបមិត្តប្រុស

អ្នកល្បីបណ្តាញសង្គមចិនម្នាក់បានបាត់ទំនាក់ទំនង ក្រោយធ្វើដំណើរមកខេត្តព្រះសីហនុ ប្រទេសកម្ពុជា ដើម្បីជួបមិត្តប្រុស បង្កឱ្យមានការព្រួយបារម្ភថានាងអាចបាត់ខ្លួន។

កាសែត JoongAng Ilbo របស់កូរ៉េខាងត្បូងជាភាសាជប៉ុន បានរាយការណ៍ថ្ងៃនេះថា អ្នកល្បីបណ្តាញសង្គមចិនដែលមានរហស្សនាមបកប្រែថា «បងស្រីក្រូច» បានមកខេត្តព្រះសីហនុ ប្រទេសកម្ពុជា នៅដើមខែនេះ ដើម្បីជួបមិត្តប្រុសដែលបើកភោជនីយដ្ឋាននៅទីនោះ។

ចន្លោះថ្ងៃទី៥ ដល់ថ្ងៃទី១១ «បងស្រីក្រូច» បានបង្ហោះតាមបណ្តាញសង្គមថា កំពុងនៅកម្ពុជា ហើយបានកក់ជើងហោះហើរត្រឡប់ទៅចិននៅថ្ងៃទី១៣។ ប៉ុន្តែចាប់ពីថ្ងៃទី១២ នាងបានបាត់ទំនាក់ទំនងទាំងស្រុង។ ទូរសព្ទរបស់នាងបិទ ហើយមិនឃើញកំណត់ត្រាចូលប្រទេសចិនវិញឡើយ។ ក្រោយមកនាងមិនមានការបង្ហោះថ្មីទៀតទេ ហើយទីតាំង IP ចូលប្រើចុងក្រោយក៏នៅកម្ពុជា។

ចុងក្រោយ ក្រុមគ្រួសារបានរាយការណ៍ទៅអាជ្ញាធរពាក់ព័ន្ធចិន ស្នើសុំស៊ើបអង្កេតករណីបាត់ខ្លួន និងស្វែងរកជំនួយពីអាជ្ញាធរបរទេស។ ទោះមិត្តភក្តិ និងអ្នកស្គាល់បានចាប់ផ្តើមស្វែងរកនាងតាមបណ្តាញសង្គមក៏ដោយ រហូតមកដល់ពេលនេះនៅមិនទាន់មានវឌ្ឍនភាព។

សេចក្តីរាយការណ៍បានឱ្យដឹងថា ការព្រួយបារម្ភកាន់តែខ្លាំង ដោយទោះមិត្តប្រុសអះអាងថាបើកភោជនីយដ្ឋាននៅទីនោះ តំបន់នេះក៏ត្រូវបានភ្ជាប់នឹងក្រុមឆបោកតាមអនឡាញ។ ទូរសព្ទមិត្តប្រុសរបស់នាងក៏បិទ ដែលបន្ថែមការថប់បារម្ភដល់ក្រុមគ្រួសារ។