នៅថ្ងៃទី១៧ ខែវិច្ឆិកា ឧត្តមក្រុមប្រឹក្សានៃអង្គចៅក្រមបានបើកសម័យប្រជុំលើកទី៣៩ នៅព្រះបរមរាជវាំង រាជធានីភ្នំពេញ ក្រោមព្រះរាជាធិបតីភាពព្រះករុណា ព្រះបាទ នរោត្តម សីហមុនី ដើម្បីចាត់វិធានការវិន័យលើមន្ត្រីតុលាការជាច្រើនរូបទូទាំងប្រទេស។ កិច្ចប្រជុំនេះបង្ហាញពីកិច្ចខិតខំរួមរបស់ព្រះមហាក្សត្រ និងស្ថាប័នតុលាការ ក្នុងការពង្រឹងការគ្រប់គ្រងផ្ទៃក្នុង និងក្រមសីលធម៌វិជ្ជាជីវៈ។
យោងតាមសេចក្តីប្រកាសផ្លូវការ ចៅក្រម២២រូប និងព្រះរាជអាជ្ញា៥រូប រួមទាំងព្រះរាជអាជ្ញារង ត្រូវបានចាត់វិធានការ។ ក្នុងចំណោមចៅក្រម មាន៣រូបត្រូវស្តីបន្ទោសផ្ទាល់មាត់ ៩រូបទទួលការព្រមានជាលាយលក្ខណ៍អក្សរដែលកត់ត្រាក្នុងសំណុំឯកសារ និង១រូបត្រូវផ្អាកការដំឡើងមុខតំណែង និងឋានន្តរស័ក្តិរយៈពេល២ឆ្នាំ។ ចៅក្រម៩រូបទៀតទទួលទណ្ឌកម្មថ្នាក់ទី២ រួមមានការផ្លាស់ប្តូរការងារ ការបណ្តុះបណ្តាលបន្ថែម និងការបន្ថយតំណែង។ ក្នុងចំណោមមន្ត្រីអយ្យការ៥រូប មាន៣រូបទទួលទណ្ឌកម្មស្រដៀងចៅក្រម រីឯ២រូបទៀតទទួលទណ្ឌកម្មធ្ងន់ជាង ដោយម្នាក់ត្រូវបណ្តេញចេញពីក្របខណ្ឌអយ្យការ និងម្នាក់ទៀតត្រូវព្យួរមុខតំណែងដោយមិនបើកប្រាក់បៀវត្សរយៈពេល១ឆ្នាំ។
សេចក្តីប្រកាសបានបញ្ជាក់ថា ការចាត់វិធានការវិន័យនេះបង្ហាញពីគោលជំហរ «មិនអត់ឱន» ចំពោះការប្រព្រឹត្តខុសរបស់ប្រព័ន្ធតុលាការកម្ពុជា ហើយបង្ហាញថាការពង្រឹងក្រមវិជ្ជាជីវៈ និងយន្តការគណនេយ្យភាព នៅតែជាជំហានសំខាន់ក្នុងកំណែទម្រង់តុលាការ។ ការចាត់វិធានការរួមនេះត្រូវបានចាត់ទុកជាវិធានការលើកកម្ពស់ជំនឿទុកចិត្ត និងតម្លាភាពរបស់តុលាការ។
រាយការណ៍សរុបដោយស្ថានីយយើង
