ថៃកាត់ខ្សែទំនាក់ទំនងតាមព្រំដែនកម្ពុជា ដើម្បីទប់ស្កាត់ការឆបោកតាមអនឡាញ

នគរបាលថៃ និងគណៈកម្មការជាតិទទួលបន្ទុកការផ្សាយសំឡេង និងទូរគមនាគមន៍ (NBTC) កំពុងបន្តប្រតិបត្តិការកាត់ផ្តាច់ខ្សែទំនាក់ទំនងតាមតំបន់ព្រំដែនកម្ពុជា។

សារព័ត៌មានថៃ Newsclip បានរាយការណ៍ថ្ងៃនេះថា ភាគីថៃនិយាយថាវិធានការនេះអនុវត្តតាមគោលនយោបាយរដ្ឋាភិបាលថៃ ក្នុងការបង្ក្រាបការឆបោកទូរគមនាគមន៍ឆ្លងដែន ដែលប្រើស្ថានីយអង់តែនទូរសព្ទ និងហេដ្ឋារចនាសម្ព័ន្ធទំនាក់ទំនងនៅក្នុងប្រទេសថៃ។

ពីថ្ងៃទី១៧ ដល់១៩ ខែវិច្ឆិកា នៅខេត្តស្រះកែវភាគខាងកើតដែលជាប់ព្រំដែនកម្ពុជា នគរបាលមូលដ្ឋាន NBTC និងប្រតិបត្តិករទូរគមនាគមន៍បានធ្វើប្រតិបត្តិការរួមគ្នា កាត់ខ្សែកាបអុបទិក និងខ្សែផ្សេងទៀតដែលតភ្ជាប់ទៅកម្ពុជា។

ប្រតិបត្តិការនេះគ្របដណ្តប់ទីតាំងសំខាន់ៗមួយចំនួន៖

• ខាងក្រោយច្រកព្រំដែន Ban Khlong Luk៖ បានកាត់ខ្សែរបស់ក្រុមហ៊ុន៩ រួមមាន AWN, TUC, Jastel និង Symphony នៅជុំវិញស្ថានីយរថភ្លើងរដ្ឋថៃ។ 

  
  

• ក្បែរចំណតរថយន្តច្រកព្រំដែន៖ បានកាត់ខ្សែបម្រុងរបស់ក្រុមហ៊ុន៣ រួមមាន AWN, Symphony និង Interlink។

  
  

• នៅស្ពានមិត្តភាពថៃ–កម្ពុជា៖ បានកាត់ខ្សែ៣របស់ AWN និង Symphony។

ប្រតិបត្តិការនេះធ្វើឱ្យខ្សែពាក់ព័ន្ធត្រូវផ្តាច់ការទំនាក់ទំនងជាមួយកម្ពុជាទាំងស្រុង។

នគរបាលថៃនិយាយថា៖ «តាមរយៈការកាត់ផ្តាច់មធ្យោបាយទំនាក់ទំនងរបស់ក្រុមឆបោកនៅក្រៅប្រទេស ពោលគឺផ្តាច់អ៊ីនធឺណិត យើងអាចទប់ស្កាត់កុំឱ្យចំនួនជនរងគ្រោះក្នុងប្រទេសថៃកើនឡើងបន្ថែម»។ នគរបាលនឹងបន្តសហការយ៉ាងជិតស្និទ្ធជាមួយ NBTC និងប្រតិបត្តិករទូរគមនាគមន៍ ដើម្បីកាត់ផ្តាច់ខ្សែដែលនៅសេសសល់។