នៅម៉ោង៦និង៥០នាទីព្រឹក ថ្ងៃទី១៥ ខែធ្នូ នាវាទេសចរណ៍ប្រណីតអន្តរជាតិ WESTERDAM បានចូលចតនៅកំពង់ផែស្វយ័តក្រុងព្រះសីហនុ ដោយនាំភ្ញៀវទេសចរអន្តរជាតិមួយក្រុមថ្មីមកកម្ពុជា និងជួយជំរុញបន្ថែមវិស័យទេសចរណ៍តាមសមុទ្រ និងទេសចរណ៍ចូលមកកម្ពុជា។
តាមព័ត៌មាន នាវា WESTERDAM ជានាវាទេសចរណ៍ដោតទង់ជាតិហូឡង់។ លើកនេះ នាវាដឹកភ្ញៀវទេសចរ១៨៧៧នាក់ ក្នុងនោះស្រី៩៩៩នាក់ មកពី៤៣ប្រទេស និងនាវិក៨០០នាក់ ក្នុងនោះស្រី១៥៧នាក់ មកពី៤០ប្រទេស។ ភ្ញៀវអាម៉េរិកមានច្រើនបំផុត គឺ៨២៤នាក់ បន្ទាប់មកអូស្ត្រាលី២៩៩នាក់។
ក្រោយនាវាចូលចត រដ្ឋបាលខេត្តព្រះសីហនុ និងមន្ទីរទេសចរណ៍ខេត្តបានរួមគ្នារៀបចំពិធីស្វាគមន៍យ៉ាងកក់ក្តៅនិងឱឡារិក ដោយសម្តែងរបាំជូនពរប្រពៃណីជូនភ្ញៀវអន្តរជាតិ។ អាជ្ញាធរក៏បានពង្រឹងសន្តិសុខនិងសណ្តាប់ធ្នាប់យ៉ាងទូលំទូលាយ ក្នុងគោលបំណងធានាសុវត្ថិភាព និងបទពិសោធន៍ល្អរបស់ភ្ញៀវក្នុងខេត្ត និងបង្ហាញរូបភាពទេសចរណ៍កម្ពុជាប្រកបដោយមិត្តភាពនិងភាពបើកចំហ។
តាមព័ត៌មាន នាវា WESTERDAM មានបណ្តោយ២៨៥.២២ម៉ែត្រ និងទទឹង៣២.២០ម៉ែត្រ។ ដំណើរលើកនេះ នាវាចេញពីប្រទេសថៃមកកម្ពុជា ហើយគ្រោងបន្តចេញទៅម៉ាឡេស៊ី នៅម៉ោង២០និង០០នាទី ថ្ងៃទី១៥ ខែធ្នូ។
អាជ្ញាធរពាក់ព័ន្ធបានបញ្ជាក់ថា ការមកដល់ជាបន្តបន្ទាប់របស់នាវាទេសចរណ៍អន្តរជាតិ មិនត្រឹមតែនាំភ្ញៀវយ៉ាងច្រើនមកខេត្តព្រះសីហនុទេ ថែមទាំងជួយជំរុញសេវាកម្មមូលដ្ឋាន ដឹកជញ្ជូន លក់រាយ និងទេសចរណ៍វប្បធម៌ ដែលមានអត្ថន័យវិជ្ជមានចំពោះការបង្កើនភាពទាក់ទាញទេសចរណ៍អន្តរជាតិរបស់កម្ពុជា។
រាយការណ៍សរុបដោយស្ថានីយយើង