ប្រទេសបារាំង បានសម្តែងការព្រួយបារម្ភយ៉ាងខ្លាំងចំពោះការកើនឡើងនៃការប្រឈមមុខដាក់គ្នារវាងប្រទេសកម្ពុជា-ថៃ បន្ទាប់ពីយោធាថៃបានបើកប្រតិបតិការវាយប្រហារលើប្រទេសកម្ពុជាដោយកំរោលតាំងពីថ្ងៃទី៧ធ្នូរមកម្លេះ។
ទន្ទឹមគ្នានេះ បារាំងបានគាំទ្រការអំពាវនាវរបស់នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ក្នុងការបង្កើតឱ្យមានបទឈប់បាញ់ភ្លាមៗ ហើយជំរុញភាគីទាំងពីរឱ្យបញ្ឈប់ការប្រយុទ្ធភ្លាមៗ និងត្រឡប់ទៅរកការសន្ទនាវិញ ស្របតាមបទប្បញ្ញត្តិនៃសេចក្តីថ្លែងការណ៍សន្តិភាពទីក្រុងគូឡាឡាំពួរ ដើម្បីឈានទៅរកការដោះស្រាយជម្លោះរវាងប្រទេសទាំងពីរដោយសន្តិវិធី។
គិតត្រឹមថ្ងៃទី១៥ធ្នូនេះ ចំនួនជនស៊ីវិលស្លាប់ពីការវាយប្រហារដោយសកម្មភាពឈ្លានពានប្រដាប់អាវុធថៃបានកើនដល់ ១២នាក់ រងរបួស ៧៤នាក់ ខណៈជនភៀសសឹកកើនដល់ជាង ៤០ម៉ឺននាក់។ នេះបើយោងតាមរដ្ឋមន្ត្រីព័ត៌មាន៕
ដោយ៖ ចិន្តា ទីទិ
