អាហារូបករណ៍ ១០០% រហូតដល់ចប់ថ្នាក់ទី១២ ត្រូវបានប្រគល់ជូនដល់ កុមារា យ៉េន រ៉ាយុទ្ធ និងកុមារី យ៉េន សុផារី ដើម្បីបន្តការសិក្សាទាំងកម្មវិធីចំណេះទូទៅខ្មែរ និងកម្មវិធីភាសាអង់គ្លេស នៅសាលារៀនសុវណ្ណភូមិ ទីតាំងប៉ោយប៉ែតទី២។
នាព្រឹកថ្ងៃទី៨ ខែមករា ឆ្នាំ២០២៥ ឯកឧត្តមបណ្ឌិត ជួន ជីវិន រដ្ឋលេខាធិការ ក្រសួងអប់រំ យុវជន និងកីឡា និងឯកឧត្តមបណ្ឌិត ប៉ាន់ ខែម ប៊ុនថន ប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត បានប្រគល់ជូនអាហារូបករណ៍ដល់កូនៗរបស់វីរយុទ្ធជន យ៉េន ថា ដែលបានពលីជីវិតក្នុងបុព្វហេតុការពារជាតិមាតុភូមិ។
ឯកឧត្តម រដ្ឋលេខាធិការ ក្រសួងអប់រំ បានមានប្រសាសន៍កោតសរសើរចំពោះវីរភាពដ៏ក្លាហានរបស់វីរយុទ្ធជន យ៉េន ថា ដែលបានលះបង់អាយុជីវិត ដើម្បីការពារបូរណភាពទឹកដី ពីការឈ្លានពានរបស់ទាហានថៃ។ ជាមួយគ្នានេះ ឯកឧត្តមក៏បានជំរុញ និងលើកទឹកចិត្តដល់ក្រុមគ្រួសារវីរយុទ្ធជន ជាពិសេសកូនៗទាំងពីរ ឱ្យខិតខំសិក្សារៀនសូត្របន្ថែម ដើម្បីក្លាយជាធនធានមនុស្សសំខាន់របស់ជាតិនាពេលអនាគត។
ឯកឧត្តមបានបន្ថែមថា សាលារៀនសុវណ្ណភូមិ ប្រៀបដូចជាផ្ទះទី២ និងជាទីកន្លែងដុះខាត់កែខៃកូនៗ ឱ្យក្លាយជាអ្នកមានចំណេះដឹង មានសមត្ថភាព និងជាសសរទ្រូងរបស់ប្រទេសជាតិនៅថ្ងៃអនាគត។
សូមក្រុមគ្រួសាររបស់វីរយុទ្ធជន ដែលបានពលីជីវិត ធ្វើការទំនាក់ទំនងមកកាន់សាលារៀនសុវណ្ណភូមិ តាមរយៈលេខទូរស័ព្ទ 015 838 902៕
ដោយ៖ ប៉ៃ សុឃីម
