កម្លាំងនគរបាលក្រុងប៉ៃលិន បន្ទាប់ពីទទួលបានព័ត៌មានពីប្រជាពលរដ្ឋអំពីករណីក្មេងទំនើង២ក្រុម បង្កហិង្សាទៅវិញទៅមក កាលពីថ្ងៃទី១២ ខែមករា ឆ្នាំ២០២៦ វេលាម៉ោងប្រហែល ១៨:០០ នាទី នៅភូមិអូរតាពុកលើ ក្រុងប៉ៃលិន។
ក្រោយទទួលព័ត៌មាន កម្លាំងនគរបាលក្រុងប៉ៃលិន បានចុះអន្តរាគមន៍បង្ក្រាបភ្លាមៗ និងឃាត់ខ្លួនក្មេងទំនើងមួយក្រុមចំនួន ៥នាក់ ព្រមទាំងដកហូតអាវុធកែច្នៃ និងម៉ូតូ ២ គ្រឿង។
បន្តស្រាវជ្រាវ រហូតដល់ថ្ងៃទី១៣ ខែមករា ឆ្នាំ២០២៦ សមត្ថកិច្ចបានឃាត់ខ្លួនបក្សពួកបន្ថែម ចំនួន ២ នាក់ ហើយបន្តឃាត់ខ្លួនក្រុមជម្លោះម្ខាងទៀត បានចំនួន ៣ នាក់ ព្រមទាំងដកហូតកាំបិត និងដាវកែច្នៃ។
សរុប សមត្ថកិច្ចបានឃាត់ខ្លួនក្មេងទំនើងទាំង ២ ក្រុម បានចំនួន ១០ នាក់ ដកហូតវត្ថុតាងរួមមាន កាំបិត ៦ ដើម ខ្សែក្រវាត់ក្បាលដែក ១ ខ្សែ និងម៉ូតូ ២ គ្រឿង។ ក្នុងនោះ សមត្ថកិច្ចកំពុងបន្តស្រាវជ្រាវ ខណៈមានជនសង្ស័យមួយចំនួនបានគេចខ្លួន។
ក្រោយការសាកសួរ ក្រុមក្មេងទំនើងទាំងនោះ បានសារភាពថា ពួកគេមានជម្លោះគ្នាតាមក្រុមជជែក (group chat) និងបានណាត់គ្នាមកវាយប្រហារពិតប្រាកដមែន។ បច្ចុប្បន្ន សមត្ថកិច្ចបានស្នើសុំគោលការណ៍ពីព្រះរាជអាជ្ញា ដើម្បីឃាត់ខ្លួនជនពាក់ព័ន្ធទាំងអស់ និងបន្តអនុវត្តតាមនីតិវិធីច្បាប់។
ដោយ៖ ប៉ៃ សុឃីម
