ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល បានថ្លែងក្នុងបទសម្ភាសន៍ថ្មីៗថា គំនិតផ្តួចផ្តើមខ្សែក្រវាត់និងផ្លូវរបស់ចិនបានផ្តល់ការគាំទ្រសំខាន់ដល់ការអភិវឌ្ឍសេដ្ឋកិច្ចកម្ពុជា ជាពិសេសការកសាងហេដ្ឋារចនាសម្ព័ន្ធ ហើយបានក្លាយជា «សរសៃឈាមសេដ្ឋកិច្ច» ជំរុញកំណើនជាតិ។ លោកបានថ្លែងអំណរគុណរដ្ឋាភិបាល និងប្រជាជនចិន ជាពិសេសប្រធានាធិបតីចិន លោក ស៊ី ជីនពីង។
ចំពោះបរិយាកាសវិនិយោគ និងពាណិជ្ជកម្ម លោក ស៊ុន ចាន់ថុល បានបញ្ជាក់ថា ចិនជាប្រភពទុនវិនិយោគបរទេសធំបំផុតរបស់កម្ពុជាជាច្រើនឆ្នាំជាប់គ្នា។ លោកសង្កត់ធ្ងន់ថា កម្ពុជាស្វាគមន៍ការវិនិយោគស្របច្បាប់ពីគ្រប់ប្រទេសដោយមិនរើសអើង និងលើកទឹកចិត្តសហគ្រាសចិនកាន់តែច្រើនឱ្យមកវិនិយោគ។ លោកថា កម្ពុជាមានអត្ថប្រយោជន៍ជាមជ្ឈមណ្ឌលក្នុងតំបន់ ច្បាប់វិនិយោគថ្មីផ្តល់ការលើកទឹកចិត្តជាច្រើន និងមានសក្តានុពលអភិវឌ្ឍន៍ល្អ។ កម្ពុជាក៏រំពឹងថា ក្នុងឆ្នាំ២០២៦នឹងមានភ្ញៀវចិនកាន់តែច្រើនមកទស្សនា ដែលជាកម្លាំងសំខាន់ជំរុញសេដ្ឋកិច្ចមូលដ្ឋាន។
ក្នុងឆ្នាំខួប៦៨នៃទំនាក់ទំនងការទូតកម្ពុជា-ចិន លោក ស៊ុន ចាន់ថុល បានរំលឹកមិត្តភាពដ៏ជ្រាលជ្រៅដែលព្រះមហាវីរក្សត្រ នរោត្តម សីហនុ និងថ្នាក់ដឹកនាំចិនជំនាន់មុនបានកសាង។ លោកថា ទំនាក់ទំនងនេះត្រូវបានពង្រឹងក្នុងសម័យដឹកនាំរបស់លោក ហ៊ុន សែន និងបន្តកាន់តែស៊ីជម្រៅក្រោមការដឹកនាំរបស់នាយករដ្ឋមន្ត្រី ហ៊ុន ម៉ាណែត ដោយភាគីទាំងពីររក្សា «មិត្តភាពដែកថែប» ជានិច្ច។ លោកក៏បញ្ជាក់ជាថ្មីថា កម្ពុជាប្រកាន់ខ្ជាប់គោលនយោបាយចិនតែមួយ ហើយនឹងបន្តបង្ក្រាបការឆបោកអនឡាញ និងសកម្មភាពខុសច្បាប់ផ្សេងៗយ៉ាងតឹងរ៉ឹង ដើម្បីបង្កើតបរិយាកាសសុវត្ថិភាព និងស្ថិរភាពសម្រាប់វិនិយោគ និងទេសចរណ៍។
ស្ថានីយនេះចងក្រងសេចក្តីរាយការណ៍។
