ចាប់តាំងពីបើកដំណើរការ ផ្លូវថ្មើរជើងភ្នំពេញមានប្រជាប្រិយភាពកាន់តែខ្លាំង និងក្លាយជាកន្លែងពេញនិយមរបស់ប្រជាពលរដ្ឋ និងភ្ញៀវទេសចរយ៉ាងឆាប់រហ័ស។ អភិបាលរាជធានីភ្នំពេញ លោក ឃួង ស្រេង បានឱ្យដឹងថា ក្នុងឆ្នាំ២០២៥ ផ្លូវនេះទទួលការមកទស្សនាជិត៦លានលើក ក្នុងនោះមានភ្ញៀវអន្តរជាតិជាង១១ម៉ឺនលើក និងក្លាយជាចំណុចលេចធ្លោថ្មីនៃការកម្សាន្ត និងទេសចរណ៍ពេលរាត្រីក្នុងរាជធានី។
ទិន្នន័យនេះត្រូវបានប្រកាសនៅកិច្ចប្រជុំរដ្ឋបាលរាជធានីភ្នំពេញ បូកសរុបការងារឆ្នាំ២០២៥ និងរៀបចំផែនការការងារឆ្នាំ២០២៦។ ផ្លូវថ្មើរជើងដែលបើកជាផ្លូវការនៅខែកុម្ភៈ ឆ្នាំ២០២៥ ពឹងផ្អែកលើអត្ថប្រយោជន៍នៃទីតាំងកណ្តាល និងសកម្មភាពកម្សាន្តកាន់តែសម្បូរបែប ដើម្បីទាក់ទាញប្រជាពលរដ្ឋ និងភ្ញៀវជាតិ អន្តរជាតិយ៉ាងច្រើន ព្រមទាំងបន្តជំរុញសេដ្ឋកិច្ចពេលរាត្រី និងទេសចរណ៍ក្នុងទីក្រុង។
លោក ឃួង ស្រេង បានថ្លែងថា រដ្ឋបាលរាជធានីនឹងបន្តកែលម្អតំបន់ទេសចរណ៍ ពង្រឹងសុវត្ថិភាពសាធារណៈ ការគ្រប់គ្រងសណ្ដាប់ធ្នាប់ និងសេវាភ្ញៀវ ដើម្បីទាក់ទាញភ្ញៀវទេសចរកាន់តែច្រើនមកភ្នំពេញ។ ក្នុងឆ្នាំ២០២៥ ភ្នំពេញទទួលការមកទស្សនាប្រមាណ១១លានលើក កើន៤,៥៣ភាគរយ ក្នុងនោះជិត១០លានលើកជាភ្ញៀវជាតិ និងជាង១លានលើកជាភ្ញៀវអន្តរជាតិ។ តាមកាលវិភាគនៅពេលរាយការណ៍ ផ្លូវថ្មើរជើងបើកថ្ងៃសៅរ៍ និងអាទិត្យ ពីម៉ោង៦ល្ងាចដល់១១យប់។
រៀបរៀងដោយស្ថានីយ។
