នៅម៉ោង២៣ ថ្ងៃទី២១ មករា មានករណីចាប់ជនក្លែងជានគរបាលនៅចំណុចប្រសព្វផ្លូវ២០០៤ ខណ្ឌពោធិ៍សែនជ័យ រាជធានីភ្នំពេញ។ បុរស៤នាក់ស្លៀកពាក់ស៊ីវិល ជិះម៉ូតូ និងពាក់ប័ណ្ណមន្ត្រីនាយកដ្ឋានស៊ើបអង្កេតព្រហ្មទណ្ឌក្លែងក្លាយ ដើម្បីបន្លំជានគរបាល ត្រូវនគរបាលសម្គាល់ឃើញនិងចាប់ខ្លួននៅកន្លែងកើតហេតុ។
ពេលកើតហេតុ អធិការរងនគរបាលខណ្ឌម្នាក់កំពុងល្បាតក្នុងមូលដ្ឋាន។ ឃើញអ្នកទាំង៤មានអាកប្បកិរិយាគួរសង្ស័យ លោកក៏ចូលសួរនាំនិងបង្ហាញអត្តសញ្ញាណ ប៉ុន្តែពួកគេមិនជឿ ហើយថែមទាំងស្រែកគំហក។ បន្ទាប់មកនគរបាលពិតជាច្រើននាក់មកដល់និងគ្រប់គ្រងអ្នកទាំង៤។ តាមនគរបាល ពួកគេមិនមែនទើបប្រព្រឹត្តជាលើកដំបូងទេ ដោយមុននេះមានជនរងគ្រោះប្ដឹងថាត្រូវពួកគេជំរិតប្រាក់៣៥០ដុល្លារ។ បច្ចុប្បន្នសំណុំរឿងកំពុងសាកសួរនិងស៊ើបអង្កេតបន្ត។
សេចក្ដីរាយការណ៍សរុបដោយស្ថានីយយើង។
