អាវុធហត្ថព្រះសីហនុចាប់ជនសង្ស័យចិន៣នាក់ក្នុងការឆ្មក់ទីតាំងគ្រឿងញៀន

ថ្ងៃទី២៤ មករា អាវុធហត្ថខេត្តព្រះសីហនុបានអនុវត្តតាមព័ត៌មានប្រជាពលរដ្ឋតាមកម្មវិធី NoDrug ក្នុងករណីសង្ស័យជួញដូរនិងចែកចាយគ្រឿងញៀនខុសច្បាប់។ មជ្ឈមណ្ឌលបញ្ជាការ២៤ម៉ោងរបស់អាជ្ញាធរជាតិប្រយុទ្ធប្រឆាំងគ្រឿងញៀន បានសម្របសម្រួលកម្លាំងជំនាញភ្លាមក្រោយទទួលព័ត៌មាន។

កម្លាំងបានឆ្មក់ឆែកទីតាំងសង្ស័យមួយនៅភូមិ៥ សង្កាត់៤ ក្រុងព្រះសីហនុ ដោយបង្ក្រាបទីតាំងគ្រឿងញៀន និងចាប់ជនសង្ស័យចិន៣នាក់ ក្នុងនោះស្ត្រីម្នាក់។ ការធ្វើតេស្តទឹកនោមលើអ្នកទាំង៣មានលទ្ធផលវិជ្ជមានចំពោះគ្រឿងញៀន។

អាវុធហត្ថរឹបអូសកេតាមីន៦,៤៧គីឡូក្រាម អ៊ិចស្តាស៊ី១,៤៦គីឡូក្រាម មេតំហ្វេតាមីន៤០៣,៣ក្រាម ហេរ៉ូអ៊ីន២៣៩,៥ក្រាម វត្ថុធាតុដើម៩៩,៣៥គីឡូក្រាម និងសារធាតុមិនស្គាល់៤០,៥គីឡូក្រាម។ ជនសង្ស័យទាំង៣កំពុងឃាត់នៅបញ្ជាការដ្ឋានអាវុធហត្ថខេត្ត ដើម្បីបន្តស៊ើបអង្កេត មុនបញ្ជូនសំណុំរឿងទៅស្ថាប័នតុលាការចាត់ការតាមច្បាប់។

ព័ត៌មានសរុបដោយ KPS99TV។