គម្រោងស្ថានីយសាករថយន្តអគ្គិសនីទៅមុខទូទាំង២៥រាជធានីខេត្ត និងគ្រោងប្រើឆាប់ៗ

អាជ្ញាធរអគ្គិសនីកម្ពុជា (EAC) ថ្មីៗនេះអំពាវនាវអ្នកកាន់អាជ្ញាបណ្ណសេវាផ្គត់ផ្គង់អគ្គិសនីទូទាំងប្រទេស វាយតម្លៃលទ្ធភាពវិនិយោគស្ថានីយសាករថយន្តអគ្គិសនីក្នុងតំបន់ផ្គត់ផ្គង់របស់ខ្លួន និងចូលរួមប្រើរថយន្តអគ្គិសនី ជាពិសេសក្នុងការងារពាក់ព័ន្ធប្រតិបត្តិការអគ្គិសនី។

EAC ថា វិធានការនេះជំរុញហេដ្ឋារចនាសម្ព័ន្ធសាក និងពន្លឿនការប្រើរថយន្តអគ្គិសនីទូទាំងប្រទេស។ សេចក្ដីអំពាវនាវត្រូវបានជូនដំណឹងផ្លូវការដល់ក្រុមហ៊ុននិងស្ថាប័នផ្ដល់សេវាអគ្គិសនី ឱ្យអភិវឌ្ឍគម្រោងស្ថានីយសាករួមជាមួយបណ្ដាញផ្គត់ផ្គង់ដែលមាន ដើម្បីស្របទិសដៅបម្លែងថាមពលជាតិ។

ក្រសួងរ៉ែនិងថាមពលបានចេញសេចក្ដីជូនដំណឹងលេខ០៣៨៩ ថ្ងៃទី២០ កុម្ភៈ ឆ្នាំ២០២៥ ស្ដីពីគោលការណ៍និងនីតិវិធីសេវាសាករថយន្តអគ្គិសនី ដែលរួមមានពន្លឿនស្ថានីយ សុវត្ថិភាព តម្លៃសមរម្យ និងដំណើរការសាកថ្មមានស្ថិរភាពនិងប្រសិទ្ធភាព។ អគ្គិសនីកម្ពុជា (EDC) បានវិនិយោគស្ថានីយសាកទូទាំង២៥រាជធានីខេត្ត ហើយសំណង់ទាំងនេះនឹងចាប់ផ្ដើមប្រើបន្តបន្ទាប់ក្នុងពេលឆាប់ៗ។

ព័ត៌មានសរុបដោយ KPS99TV។