ភ្នំពេញ៖ កម្ពុជាកំពុងបង្កើនល្បឿនក្នុងការបង្កើតក្របខ័ណ្ឌច្បាប់ទំនើបមួយ ដើម្បីឆ្លើយតបនឹងការកើនឡើងនៃបទល្មើសឆបោកតាមប្រព័ន្ធបច្ចេកវិទ្យា ខណៈឯកឧត្តម កើត រិទ្ធ ឧបនាយករដ្ឋមន្ត្រី និងជារដ្ឋមន្ត្រីក្រសួងយុត្តិធម៌ បានអញ្ជើញដឹកនាំកិច្ចប្រជុំបច្ចេកទេសអន្តរស្ថាប័ន ពិនិត្យ និងពិភាក្សាលើសេចក្តីព្រាងច្បាប់ស្តីពី «ការប្រឆាំងការឆបោកតាមប្រព័ន្ធបច្ចេកវិទ្យា»។
ការរៀបចំព្រាងច្បាប់នេះ បានអនុវត្តឡើងបន្ទាប់ពីទទួលបានគោលការណ៍ដឹកនាំដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដោយមានគោលបំណងបង្កើតយន្តការច្បាប់ឱ្យមានភាពច្បាស់លាស់ សមស្រប និងមានប្រសិទ្ធភាព ក្នុងការបង្ការ ទប់ស្កាត់ និងបង្ក្រាបបទល្មើសឆបោកឌីជីថល។
កិច្ចប្រជុំបានប្រមូលផ្តុំតំណាងពីក្រសួង និងស្ថាប័នពាក់ព័ន្ធជាច្រើន រួមមាន ក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ធនាគារជាតិនៃកម្ពុជា ក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស គណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ព្រមទាំងអង្គភាពនគរបាលយុត្តិធម៌។ ការចូលរួមយ៉ាងទូលំទូលាយនេះ បង្ហាញពីការសម្របសម្រួលយ៉ាងជិតស្និទ្ធរវាងស្ថាប័ន ដើម្បីធានាថា ច្បាប់ថ្មីនេះមានភាពគ្រប់ជ្រុងជ្រោយផ្នែកបច្ចេកទេស និងអាចអនុវត្តបានជាក់ស្តែង។
ជាលទ្ធផល អង្គប្រជុំបានឯកភាពជារួមលើខ្លឹមសារសំខាន់ៗនៃសេចក្តីព្រាងច្បាប់ ដែលត្រូវបានរំពឹងថា នឹងក្លាយជាគោលការណ៍គតិយុត្តដ៏រឹងមាំមួយ សម្រាប់ការពារប្រជាពលរដ្ឋ និងប្រព័ន្ធហិរញ្ញវត្ថុពីហានិភ័យនៃការឆបោកតាមអ៊ីនធឺណិត។
ច្បាប់នេះក៏ត្រូវបានរៀបចំស្របតាមអនុសញ្ញារបស់អង្គការសហប្រជាជាតិស្តីពីការប្រឆាំងបទល្មើសបច្ចេកវិទ្យា ដែលកម្ពុជាបានចុះហត្ថលេខា បង្ហាញពីការប្តេជ្ញាចិត្តរបស់រាជរដ្ឋាភិបាល ក្នុងការសម្របសម្រួលជាមួយស្តង់ដារអន្តរជាតិ និងការប្រយុទ្ធប្រឆាំងបទល្មើសឆ្លងដែន។
ការបង្កើតច្បាប់ស្តីពី «ការប្រឆាំងការឆបោកតាមប្រព័ន្ធបច្ចេកវិទ្យា» ត្រូវបានចាត់ទុកថា ជាជំហានយុទ្ធសាស្ត្រសំខាន់មួយ ក្នុងការពង្រឹងសន្តិសុខឌីជីថល និងការពារប្រយោជន៍សាធារណៈ នៅក្នុងសម័យសេដ្ឋកិច្ចឌីជីថលកំពុងរីកចម្រើនយ៉ាងលឿន។ ដោយ៖ KPS99TV
