ឈើប្រភេទសុក្រំចំនួន២៥ដុំ ត្រូវបានរឹបអូសក្នុងបទល្មើសធនធានធម្មជាតិជាក់ស្តែងដោយក្រុមអធិការកិច្ចនៃក្រសួងបរិស្ថាន និងអាជ្ញាធរមូលដ្ឋានខេត្តក្រចេះ កាលពីថ្ងៃទី១៩ ខែកុម្ភៈ។ បើតាមក្រសួងបរិស្ថាន ការបង្ក្រាបបទល្មើសនេះ ធ្វើឡើងនៅពេលជនល្មើសកំពុងតែធ្វើសកម្មភាពដឹកឈើសុក្រំចំនួន២៥ដុំតាមម៉ូតូ៤គ្រឿងឆ្លងទូកដទាំងកណ្តាលថ្ងៃ នៅស្រុកសំបូរ ខេត្តក្រចេះ។ ប៉ុន្តែយ៉ាងណា ជនសង្ស័យបានរត់គេចខ្លួន មុនពេលសមត្ថកិច្ចទៅដល់។
ពាក់ព័ន្ធករណីនេះ ក្រុមការងារបានប្រគល់វត្ថុតាងរួមមានដូចខាងលើជូនសង្កាត់រដ្ឋបាលព្រៃឈើសណ្តាន់ អនុវត្តនីតិវិធី ដើម្បីស្វែងរកជនសង្ស័យមកដាក់ទោសតាមច្បាប់។ ចំណែក ក្រុមការងារនឹងបន្តសហការជាមួយអាជ្ញាធរមូលដ្ឋាន រួមជាមួយប្រជាពលរដ្ឋ ក៏ដូចជាក្រុមហ៊ុនដែលប្រកបអាជីវកម្មទូកដ ឬសាឡាងចម្លងពុំអនុញ្ញាតឱ្យរថយន្ត ម៉ូតូ ឬគោយន្តកែឆ្នៃទាំងឡាយណាដែលមានដឹកបទល្មើសធនធានធម្មជាតិឆ្លងឡើយ និងចូលរួមសហការផ្តល់ព័ត៌មានជូនសមត្ថកិច្ចចុះអន្តាគមន៍បង្ក្រាបឱ្យបានទាន់ពេលវេលា៕
ដោយ៖ ង៉ែត ពិសាន្ត
