ក្រសួងការពារជាតិបដិសេធការត្រៀមជម្លោះលើកទី៣ និងបញ្ជាក់ការប្ដេជ្ញារក្សាសន្តិភាព

ក្រសួងការពារជាតិកម្ពុជាបានបញ្ជាក់នៅថ្ងៃទី២៤ ខែមីនា ថាសេចក្ដីផ្សាយរបស់សារព័ត៌មានថៃដែលថាកម្ពុជាកំពុងត្រៀមជម្លោះប្រដាប់អាវុធលើកទី៣ គឺមិនត្រឹមត្រូវ គ្មានមូលដ្ឋាន និងមិនឆ្លុះបញ្ចាំងស្ថានភាពជាក់ស្តែង។ អ្នកនាំពាក្យក្រសួង លោកស្រីឧត្តមសេនីយ៍ឯក ម៉ាលី សុជាតា បានបដិសេធការចោទប្រកាន់នេះ ដែលសេចក្ដីផ្សាយបានដកស្រង់ប្រភពស៊ើបការណ៍ថៃ។

លោកស្រីបញ្ជាក់ថា កងយោធពលខេមរភូមិន្ទបន្តប្ដេជ្ញាគោរពសេចក្ដីថ្លែងការណ៍រួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) ចុះថ្ងៃទី២៧ ខែធ្នូ ឆ្នាំ២០២៥ និងសេចក្ដីប្រកាសរួមស្ដីពីសន្តិភាព ចុះថ្ងៃទី២៦ ខែតុលា ឆ្នាំ២០២៥។

តាមការបញ្ជាក់របស់លោកស្រី កម្ពុជាបន្តអនុវត្តបទបញ្ជារបស់រាជរដ្ឋាភិបាល ក្នុងការរក្សាសន្តិភាព និងមិនបង្កភាពតានតឹង។ ជំហររបស់កម្ពុជាគឺដោះស្រាយបញ្ហាព្រំដែនតាមការសន្ទនា និងដោយសន្តិវិធី ស្របតាមច្បាប់អន្តរជាតិ ព្រមទាំងសន្ធិសញ្ញា និងកិច្ចព្រមព្រៀងទ្វេភាគីដែលមានស្រាប់។