ប្រជាពលរដ្ឋជាង ៣០០០គ្រួសារ នៅភូមិ១ សង្កាត់លេខ១ ក្រុងព្រះសីហនុ កាលពីរសៀលថ្ងៃទី២៨ ខែមីនា បានរៀបចំកម្មវិធីពិសាអាហារសាមគ្គី និងថ្លែងអំណរគុណរាជរដ្ឋាភិបាលកម្ពុជា ជាពិសេសឯកឧត្តម ម៉ាង ស៊ីណេត អភិបាលខេត្តព្រះសីហនុ និងថ្នាក់ដឹកនាំពាក់ព័ន្ធផ្សេងទៀតដែលបានកសាងផ្លូវបេតុង១ខ្សែប្រគល់ឱ្យពួកគាត់ប្រើប្រាស់ងាយស្រួលក្នុងការធ្វើដំណើរ។
ឯកឧត្តម ម៉ាង ស៊ីណេត អមដំណើរដោយលោក សរ កក្កដា អភិបាលក្រុងព្រះសីហនុ រួមនឹងថ្នាក់ដឹកនាំផ្សេងទៀត បានអញ្ជើញប្រគល់ផ្លូវបេតុង១ខ្សែជូនប្រជាពលរដ្ឋដោយផ្ទាល់ និងបានណែនាំឱ្យប្រជាពលរដ្ឋជួយថែទាំទាំងអស់គ្នា ដោយឯកឧត្តម ពន្យល់ថា «ផ្លូវនេះរដ្ឋជាអ្នកធ្វើពិតមែន ប៉ុន្តែវាជារបស់ពលរដ្ឋគ្រប់គ្នា ដូច្នេះត្រូវជួយថែទាំទាំងអស់គ្នា ដើម្បីឱ្យផ្លូវនេះជាប់បានយូរអង្វែង»។
ឯកឧត្តមអភិបាលខេត្ត បានថ្លែងអំណរគុណប្រជាពលរដ្ឋទាំងអស់ដែលបានចូលរួមចំណែកធ្វើឱ្យសមិទ្ធផលមួយនេះ(ផ្លូវបេតុង១ខ្សែ)លេចចេញជារូបរាងឡើងតាមប្លង់គោល។ ក្នុងន័យនេះ ឯកឧត្តមចង់សង្កត់ធ្ងន់ថា ប្រសិនបើក្រុមការងារខេត្ត-ក្រុងចង់ធ្វើ ប៉ុន្តែគ្មានការចូលរួមពីប្រជាពលរដ្ឋទាំងអសគឺធ្វើទៅមិនបាននោះទេ។ យ៉ាងណា សមិទ្ធផលនេះ អ្នកដែលទទួលផលច្រើនជាងគេគឺប្រជាពលរដ្ឋដែលរស់នៅតាមបណ្តោយផ្លូវបេតុងនេះផ្ទាល់តែម្តង។ ទន្ទឹមគ្នានេះ ឯកឧត្តម ម៉ាង ស៊ីណេត បង្ហើបប្រាប់ពលរដ្ឋថា ឆ្នាំនេះ នៅភូមិ១ សង្កាត់លេខ១ ក្រុងព្រះសីហនុ នឹងទទួលបានផ្លូវបេតុង២ខ្សែបន្ថែមទៀត។
ចំណែក លោក ឌី ឌុំ មេភូមិ១នៃសង្កាត់លេខ១ បានបញ្ជាក់ថា ផ្លូវបេតុង១ខ្សែនេះមានប្រវែង ៩៥០ម៉ែត្រ ទទឹង ៧,២៥ម៉ែត្រ ដែលបានបម្រើផលប្រយោជន៍ជូនប្រជាពលរដ្ឋនៅក្នុងភូមិជាង ៣០០០គ្រួសារ។ មេភូមិ១ សង្កាត់លេខ១ បានបញ្ជាក់ទៀតថា ដោយសារមើលឃើញពីការលំបាក និងជាតម្រូវការចាំបាច់របស់ប្រជាពលរដ្ឋក្នុងការប្រើប្រាស់ប្រចាំថ្ងៃ ទើបរដ្ឋបាលខេត្តទម្លាក់ថវិកាសាងសង់ផ្លូវ១ខ្សែនេះជូនពលរដ្ឋតែម្តង។ ក្នុងនាមតំណាងប្រជាពលរដ្ឋក្នុងភូមិជាង៣០០០គ្រួសារ លោកបានបង្ហើបប្រាប់ថា ឆ្នាំ២០២៦នេះ រដ្ឋបាលខេត្តនឹងធ្វើផ្លូវបេតុងជូនពលរដ្ឋក្នុងភូមិ១ចំនួន ២ខ្សែបន្ថែមទៀត។ តែលោក ក៏បានសំណូមពរឱ្យប្រជាពលរដ្ឋចូលរួមថែរក្សាផ្លូវបេតុង១ខ្សែដែលជាសមិទ្ធផលរបស់យើងគ្រប់គ្នានេះឱ្យបានល្អផងដែរ៕
អត្ថបទ៖ ង៉ែត ពិសាន្ត
រូបភាព៖ ទាវ វិឆាត
