នៅថ្ងៃទី៣ ខែមេសា រដ្ឋមន្ត្រីក្រសួងទេសចរណ៍កម្ពុជា លោក ហួត ហាក់ បានជួបពិភាក្សាជាមួយលោកស្រី Angelina Jolie តារាភាពយន្តហូលីវូដ និងអ្នកបំពេញការងារមនុស្សធម៌ នៅខេត្តសៀមរាប អំពីការអភិវឌ្ឍទេសចរណ៍ និងការការពារបេតិកភណ្ឌវប្បធម៌និងធម្មជាតិ។ កិច្ចពិភាក្សាផ្ដោតលើការពង្រឹងកិច្ចសហការក្នុងវិស័យនានា ដើម្បីលើកកម្ពស់ទេសចរណ៍ និងអភិរក្សធនធានវប្បធម៌និងធម្មជាតិ។
ភាគីទាំងពីរក៏បានផ្លាស់ប្ដូរយោបល់អំពីការលើកកម្ពស់កិត្តិនាមកម្ពុជាលើឆាកអន្តរជាតិ តាមរយៈការផ្សព្វផ្សាយគោលដៅទេសចរណ៍ ការគាំទ្រសហគមន៍ សកម្មភាពវប្បធម៌និងសិល្បៈ ព្រមទាំងការអភិរក្សធនធានធម្មជាតិ។
តាមសេចក្ដីរាយការណ៍អំពីជំនួបដែលគណនីទេសចរណ៍បានផ្សព្វផ្សាយ លោកស្រី Angelina Jolie បានបំពេញការងារមនុស្សធម៌នៅកម្ពុជា និងប្រទេសផ្សេងៗអស់រយៈពេលជាច្រើនឆ្នាំ រួមមានការអភិរក្សធនធានធម្មជាតិនិងវប្បធម៌ ការអប់រំ សុខាភិបាល ការអភិវឌ្ឍសហគមន៍ និងទេសចរណ៍ប្រកបដោយចីរភាព។
ការចូលរួមរបស់លោកស្រីក្នុងស្នាដៃភាពយន្ត ដូចជា First They Killed My Father និង Tomb Raider ក៏បានជួយណែនាំភាពទាក់ទាញផ្នែកវប្បធម៌ និងធនធានទេសចរណ៍កម្ពុជាទៅកាន់ទស្សនិកជនអន្តរជាតិ។ សេចក្ដីរាយការណ៍បានចាត់ទុកជំនួបនេះថាជាឱកាសពង្រឹងកិច្ចសហការអន្តរជាតិផ្នែកវប្បធម៌ និងទេសចរណ៍។
