នារសៀលថ្ងៃទី៧ ខែមេសា រដ្ឋបាលភ្នំពេញបានប្រជុំសរុបការងារបង្ក្រាបស្គេម និងដាក់ផែនការបន្ត។ អភិបាលភ្នំពេញ លោក ឃួង ស្រេង បានលើកឡើងថា នឹងពង្រឹងការអនុវត្តច្បាប់និងការចូលរួមរបស់ប្រជាជន ដើម្បីកាត់បន្ថយយ៉ាងខ្លាំង ឬលុបបំបាត់ទីតាំងស្គេមក្នុងមួយទៅពីរខែខាងមុខ ឆ្ពោះទៅគោលដៅទីក្រុងគ្មានស្គេម។
អភិបាលបានអំពាវនាវឱ្យការបង្ក្រាបក្លាយជាយន្តការប្រចាំ មិនមែនជាយុទ្ធនាការបណ្ដោះអាសន្ន។ កិច្ចប្រជុំបានសរុបបទពិសោធន៍និងចំណុចខ្វះខាត ហើយណែនាំគណៈបញ្ជាការឯកភាពខណ្ឌទាំង១៤ឱ្យរៀបចំផែនការ សហការជាមួយនគរបាលរាជធានី និងលើកទឹកចិត្តប្រជាជនរាយការណ៍ទីតាំងសង្ស័យ។ អ្នកពាក់ព័ន្ធនិងម្ចាស់ទីតាំងដែលបណ្ដោយឱ្យមានបទល្មើស ត្រូវរងការអនុវត្តច្បាប់ រួមទាំងការទទួលខុសត្រូវព្រហ្មទណ្ឌតាមលក្ខខណ្ឌច្បាប់។
ស្នងការនគរបាលភ្នំពេញ លោក ជួន ណារិន្ទ បានរាយការណ៍ថា ពីថ្ងៃទី៣ កុម្ភៈ ដល់ថ្ងៃទី៧ មេសា មានការឃាត់ខ្លួនអ្នកពាក់ព័ន្ធស្គេម១១៦៥នាក់ និងបញ្ជូន២២ករណី មាន១៤០នាក់ ក្នុងនោះខ្មែរ៥៩នាក់ ទៅតុលាការ។ អាជ្ញាធរបានបញ្ជាក់ថា នឹងបន្តការអនុវត្តច្បាប់និងកិច្ចសហការអន្តរស្ថាប័ន ដើម្បីទប់ស្កាត់ស្គេមនៅរាជធានី។
