លោក ស សុខា៖ ជនបរទេសពាក់ព័ន្ធអំពើឆបោកដែលត្រូវចាប់ខ្លួន បណ្តេញចេញ ឬចាកចេញដោយស្ម័គ្រចិត្ត មានសរុបប្រមាណ៣០ម៉ឺននាក់

ក្នុងជំនួបនៅរាជធានីភ្នំពេញ កាលពីថ្ងៃទី២៧ ខែឧសភា ជាមួយលោក Pedro Zwahlen ឯកអគ្គរដ្ឋទូតស្វីសប្រចាំកម្ពុជា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃកម្ពុជា លោក ស សុខា បានថ្លែងថា គិតត្រឹមពេលនោះ ជនបរទេសសង្ស័យពាក់ព័ន្ធនឹងអំពើឆបោកអនឡាញដែលត្រូវបានចាប់ខ្លួន បណ្តេញចេញ ឬចាកចេញពីកម្ពុជាដោយស្ម័គ្រចិត្ត មានសរុបប្រមាណ៣០ម៉ឺននាក់។

លោក ស សុខា បានបញ្ជាក់ថា មេក្លោងក្រុមឆបោកមួយចំនួនត្រូវបានចាប់ខ្លួន និងបញ្ជូនត្រឡប់ទៅប្រទេសដើម ខណៈអ្នកខ្លះកំពុងជាប់ពន្ធនាគារ។ លោកក៏បានឱ្យដឹងថា រាជរដ្ឋាភិបាលកម្ពុជាបានចាត់វិធានការចំពោះមន្ត្រីពាក់ព័ន្ធនឹងបញ្ហាឆបោក រួមមានការចាប់ខ្លួន ការបញ្ជូនទៅតុលាការ ការដកតំណែង និងការផ្លាស់ប្តូរភារកិច្ចជាដើម។