នៅព្រឹកថ្ងៃទី៩ ខែកក្កដា សម្តេច ហ៊ុន សែន ប្រធានព្រឹទ្ធសភាកម្ពុជា បានថ្លែងនៅខេត្តស្ទឹងត្រែង ដោយរំលឹកដំណើររបស់កម្ពុជាពីសង្គ្រាមទៅសន្តិភាព និងលើកសំណួរថា៖ «បើនាយករដ្ឋមន្ត្រីមិនមែនជាសម្តេច ហ៊ុន សែន តើសង្គ្រាមនៅកម្ពុជាអាចបញ្ចប់បានដែរឬទេ?» សម្តេចបានមានប្រសាសន៍ថា ការសម្រេចបានសន្តិភាពពេញលេញ បានបង្កើតមូលដ្ឋានរឹងមាំសម្រាប់ការអភិវឌ្ឍសេដ្ឋកិច្ចនិងសង្គម។
សម្តេច ហ៊ុន សែន បានមានប្រសាសន៍ថា កម្ពុជាធ្លាប់ឆ្លងកាត់ជម្លោះផ្ទៃក្នុងប្រមាណ៣០ឆ្នាំ ហើយសង្គ្រាមអូសបន្លាយបានរារាំងការអភិវឌ្ឍយ៉ាងខ្លាំង។ នៅចុងទសវត្សរ៍១៩៨០ ភាគីនានាបានចាប់ផ្តើមស្វែងរកដំណោះស្រាយនយោបាយតាមការចរចា ក្នុងនោះព្រះបរមរតនកោដ្ឋ នរោត្តម សីហនុ និងសម្តេច ហ៊ុន សែន ជាឥស្សរជនសំខាន់ក្នុងការជំរុញដំណើរការសន្តិភាព។ ថ្ងៃទី២៣ ខែតុលា ឆ្នាំ១៩៩១ កម្ពុជាបានចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស ដាក់មូលដ្ឋានសម្រាប់ស្ដារសន្តិភាពនិងសណ្ដាប់ធ្នាប់នយោបាយឡើងវិញ ហើយបន្ទាប់មកមានការបោះឆ្នោតទូទាំងប្រទេស ការអនុម័តរដ្ឋធម្មនុញ្ញថ្មី និងការស្ដាររបបរាជានិយមអាស្រ័យរដ្ឋធម្មនុញ្ញ។
ទោះជាយ៉ាងណា សម្តេច ហ៊ុន សែន បានបញ្ជាក់ថា កិច្ចព្រមព្រៀងសន្តិភាពទីក្រុងប៉ារីសមិនបានបញ្ចប់ជម្លោះប្រដាប់អាវុធភ្លាមៗទេ ដោយកម្លាំងខ្មែរក្រហមដែលនៅសេសសល់បន្តធ្វើសកម្មភាព។ ដើម្បីសម្រេចសន្តិភាពទាំងស្រុង សម្តេចបានជំរុញអនុវត្តនយោបាយឈ្នះឈ្នះនៅឆ្នាំ១៩៩៦ ដែលចុងក្រោយនាំឱ្យកម្លាំងប្រដាប់អាវុធខ្មែរក្រហមរលាយ។
សម្តេច ហ៊ុន សែន បានមានប្រសាសន៍ថា ថ្ងៃទី២៩ ខែធ្នូ ឆ្នាំ១៩៩៨ កម្ពុជាសម្រេចបានការឈប់បាញ់ទូទាំងប្រទេស និងបញ្ចប់សង្គ្រាមរាប់ទសវត្សរ៍ជាផ្លូវការ ដោយចូលដំណាក់កាលថ្មីនៃការអភិវឌ្ឍដោយសន្តិភាព។ សម្តេចបញ្ជាក់ថា បើសង្គ្រាមមិនបញ្ចប់ ប្រទេសនៅតែត្រូវប្រើធនធានជាច្រើនសម្រាប់ជម្លោះ ហើយការអភិវឌ្ឍសេដ្ឋកិច្ចនិងសង្គមមិនអាចទទួលបានលទ្ធផលដូចសព្វថ្ងៃ។
សម្តេច ហ៊ុន សែន ក៏បានមានប្រសាសន៍ថា សម្តេចពេញចិត្តចំពោះការចូលរួមនាំឱ្យប្រទេសសម្រេចសន្តិភាពនិងស្ថិរភាពពេញលេញ និងជំរុញការអភិវឌ្ឍ ហើយយល់ថាសន្តិភាពជាមូលដ្ឋានសំខាន់ជានិច្ចសម្រាប់ការអភិវឌ្ឍកម្ពុជា។
សម្តេច ហ៊ុន សែន បានចូលកាន់តំណែងនាយករដ្ឋមន្ត្រីកម្ពុជាថ្ងៃទី១៤ ខែមករា ឆ្នាំ១៩៨៥ កាន់តំណែងជាង៣៨ឆ្នាំ ហើយចាកចេញពីតំណែងនៅថ្ងៃទី២២ ខែសីហា ឆ្នាំ២០២៣ ដោយព្រះរាជាណាចក្រមានសម្តេច ហ៊ុន ម៉ាណែត ដែលជាកូនប្រុសច្បងរបស់សម្តេច ចូលកាន់តំណែងបន្ត។
