សម្ដេច ហ៊ុន ម៉ាណែត៖ មន្ត្រីពាក់ព័ន្ធការឆបោកតាមប្រព័ន្ធបច្ចេកវិទ្យានឹងត្រូវស៊ើបអង្កេតតាមច្បាប់

ក្នុងបទសម្ភាសន៍ជាមួយសារព័ត៌មាន Bloomberg នាពេលថ្មីៗនេះ នាយករដ្ឋមន្ត្រីកម្ពុជា សម្ដេច ហ៊ុន ម៉ាណែត បានមានប្រសាសន៍ថា រាជរដ្ឋាភិបាលនឹងបន្តប្រតិបត្តិការបង្ក្រាបការឆបោកតាមប្រព័ន្ធទូរគមនាគមន៍ និងអ៊ីនធឺណិត ហើយចាត់វិធានការតាមច្បាប់ចំពោះបុគ្គល និងស្ថាប័នដែលសង្ស័យថាបានចូលរួម កាងការពារ ឬបណ្ដែតបណ្ដោយឱ្យមានបទល្មើសទាំងនេះ។
សម្ដេច ហ៊ុន ម៉ាណែត បានបញ្ជាក់ថា ការបង្ក្រាបនេះផ្ដោតលើអំពើខុសច្បាប់ និងបទល្មើស មិនមែនលើក្រុមមនុស្សជាក់លាក់ណាមួយឡើយ។ មិនថាអ្នកពាក់ព័ន្ធមានអត្តសញ្ញាណ តួនាទី ឬឋានៈសង្គមបែបណាទេ ឱ្យតែសង្ស័យថាប្រព្រឹត្តបទល្មើស និងមានភស្តុតាងពាក់ព័ន្ធ នឹងត្រូវស៊ើបអង្កេតតាមច្បាប់។
សម្ដេចបានលើកឡើងថា រាជរដ្ឋាភិបាលបានចាត់វិធានការតាមច្បាប់រួចហើយចំពោះមន្ត្រីយោធា នគរបាល និងមន្ត្រីមូលដ្ឋានមួយចំនួន ដែលសង្ស័យថាបានចូលរួម ឬកាងការពារសកម្មភាពឆបោក ឬមិនបានបំពេញភារកិច្ចបង្ក្រាបឱ្យមានប្រសិទ្ធភាព។ វិធានការទាំងនេះរួមមានការផ្លាស់ប្ដូរតួនាទីមន្ត្រីថ្នាក់ឧត្ដមសេនីយ៍ផ្កាយបី ផ្កាយពីរ និងផ្កាយមួយមួយចំនួន ព្រមទាំងការចាត់វិធានការចំពោះមន្ត្រីថ្នាក់ខេត្ត និងប្រធាននគរបាលមួយចំនួន។
សម្ដេច ហ៊ុន ម៉ាណែត បានសង្កត់ធ្ងន់ថា ការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាជាការងារអាទិភាពមួយរបស់រាជរដ្ឋាភិបាលនាពេលបច្ចុប្បន្ន។ ប្រតិបត្តិការពាក់ព័ន្ធនឹងបន្តអនុវត្តតាមច្បាប់ ស៊ើបអង្កេតដល់ទីបញ្ចប់ចំពោះអ្នកពាក់ព័ន្ធគ្រប់រូប និងបន្តបង្ក្រាប ព្រមទាំងលុបបំបាត់បណ្ដាញឧក្រិដ្ឋកម្មឆបោកតាមទូរគមនាគមន៍ និងអ៊ីនធឺណិត។