ទោះខាតចំណូលពន្ធគយជាង ៤០០លានដុល្លារ កម្ពុជាចំណេញសន្ទុះនាំចេញជាង ២០ពាន់លានដុល្លារ

ការអនុវត្តកិច្ចព្រមព្រៀងពាណិជ្ជកម្មសេរី (FTA) បានធ្វើឱ្យកម្ពុជាបាត់បង់ចំណូលពន្ធគយពន្ធគយប្រមាណ ប្រមាណ ១ ៦៨៨.៧២ ប៊ីលានរៀល ប្រមាណ ៤២០.៥១ លានដុល្លារអាម៉េរិក (កើន ៦៧.១៩%) ក្នុងឆមាសទី១ ឆ្នាំ២០២៦។ ផ្ទុយទៅវិញ យន្តការនេះបានក្លាយជាកម្លាំងចលករដ៏ខ្លាំងក្លាជួយរុញច្រានទំហំនាំចេញរបស់កម្ពុជាឱ្យហក់ឡើងដល់ ២០.៨១ ពាន់លានដុល្លារ ក្នុងរយៈពេល ៧ខែដើមឆ្នាំ២០២៦ ពោលគឺកើនឡើង ២១.៣% ធៀបនឹងរយៈពេលដូចគ្នាក្នុងឆ្នាំ២០២៥។
ថ្លែងក្នុងសិក្ខាសាលាស្ដីពីការអនុវត្តកិច្ចព្រមព្រៀងពាណិជ្ជកម្មសេរី លោក ចាន់ សុភាព អគ្គនាយករងនៃអគ្គនាយកដ្ឋានគយនិងរដ្ឋាករកម្ពុជា (អគរ) បានគូសបញ្ជាក់ថា បច្ចុប្បន្នកម្ពុជាកំពុងអនុវត្តកិច្ចព្រមព្រៀង ចំនួន ១១ (រួមមានកិច្ចព្រមព្រៀងពាណិជ្ជកម្មទំនិញអាស៊ាន (ATIGA), អាស៊ាន-ចិន, អាស៊ាន-កូរ៉េ, អាស៊ាន-ឥណ្ឌា, អាស៊ាន-ជប៉ុន, អាស៊ាន-អូស្ត្រាលី/នូវែលសេឡង់, អាស៊ាន-ហុងកុង កិច្ចព្រមព្រៀងភាពជាដៃគូសេដ្ឋកិច្ចទូលំទូលាយ (RCEP), កម្ពុជា-ចិន, កម្ពុជា-កូរ៉េខាងត្បូង, និងកម្ពុជា-អេមីរ៉ាតអារ៉ាប់រួម ព្រមទាំងបន្តចរចាបង្កើតកិច្ចព្រមព្រៀងថ្មីៗបន្ថែមទៀត។
កំណើននាំចេញយ៉ាងគំហុកនេះ បានឆ្លុះបញ្ចាំងយ៉ាងច្បាស់ពីប្រសិទ្ធភាពនៃការទាញយកផលប្រយោជន៍ពីរបបអនុគ្រោះពន្ធ និងការធ្វើសមាហរណកម្មសេដ្ឋកិច្ចកម្ពុជាទៅក្នុងទីផ្សារតំបន់និងសកលលោក សំដៅជំរុញកំណើនសេដ្ឋកិច្ចជាតិប្រកបដោយចីរភាព និងបរិយាប័ន្ន៕ដោយ៖ ប៉ៃ សុឃីម