លោកជំទាវបណ្ឌិត ពេជ ចន្ទមុន្នី ផ្ញើសារជូនពរដល់ប្រជាពលរដ្ឋខ្មែរ ជូនដល់វីរកងទ័ព វីរនគរបាលជាតិ និងកម្លាំងប្រដាប់អាវុធទាំងអស់ ក្នុងឱកាសឆ្នាំថ្មី ២០២៦

ក្នុងឱកាសពិធីបុណ្យចូលឆ្នាំថ្មី ឆ្នាំសកល ២០២៦ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានផ្ញើសារជូនពរដល់ប្រជាពលរដ្ឋខ្មែរទាំងអស់គ្នា ដោយសូមឲ្យយកការឈឺចាប់ក្នុងឆ្នាំ ២០២៥ កន្លងមក កែប្រែមកជាការខំប្រឹងប្រែងរៀនសូត្រ ពង្រឹងខ្លួនឯងឲ្យកាន់តែរឹងមាំ បន្តការរួបរួមជាតិ ចេះស្រលាញ់ជាតិ និងប្រជាពលរដ្ឋរបស់ខ្លួន ព្រមទាំងចូលរួមជួយជាតិយើងតាមចំណេះ និងសមត្ថភាពរៀងៗខ្លួន ដើម្បីឲ្យជាតិ និងប្រទេសយើងកាន់តែរឹងមាំ ព្រោះយើងមិនចង់ឲ្យកូនចៅរបស់យើងជួបប្រទះហេតុការណ៍ដូចឆ្នាំ ២០២៥ ទៀតឡើយ។ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានមានប្រសាសន៍គូសបញ្ជាក់ថា «ឆ្នាំ ២០២៥ កន្លងមកនេះ ជាឆ្នាំមួយដែលយើងមិនអាចបំភ្លេចបាន ជាឆ្នាំដែលបានបង្ហាញឲ្យឃើញយ៉ាងច្បាស់អំពីផលវិបាកនៃសង្គ្រាម និងអត្ថន័យពិតប្រាកដនៃសន្តិភាព ដែលជំនាន់ជីដូនជីតា និងឪពុកម្តាយតែងតែអប់រំយើង។ នេះក៏ជាឆ្នាំដំបូងក្នុងរយៈពេលជាង ៤០ ឆ្នាំ ដែលខ្មែរបានរួបរួមកម្លាំងគ្នា ទាំងក្នុងប្រទេស និងក្រៅប្រទេស ដើម្បីការពារប្រទេសកម្ពុជាពីការឈ្លានពាន»។ ជាមួយគ្នានេះ លោកជំទាវបណ្ឌិត បានថ្លែងអំណរគុណយ៉ាងជ្រាលជ្រៅជូនដល់វីរកងទ័ព វីរនគរបាលជាតិ និងកម្លាំងប្រដាប់អាវុធទាំងអស់ ដែលបានខិតខំប្រឹងប្រែងការពារទឹកដីកម្ពុជាយើងពីការឈ្លានពាន ដោយភាពអង់អាចក្លាហាន។ លោកជំទាវបានបញ្ជាក់ថា ប្រសិនបើគ្មានការលះបង់ និងការខិតខំរបស់ពួកគាត់ទេ នោះប្រជាពលរដ្ឋទាំងអស់គ្នាក៏មិនអាចឆ្លងឆ្នាំថ្មីដោយសេចក្តីសុខសាន្ត និងសប្បាយរីករាយដូចសព្វថ្ងៃនេះបានឡើយ។ សូមឲ្យឆ្នាំ ២០២៦ នេះ ប្រទេសកម្ពុជាទទួលបានសុខសន្តិភាពឡើងវិញ ប្រជាពលរដ្ឋទាំងអស់ ជាពិសេសវីរកងទ័ព វីរនគរបាលជាតិ និងកម្លាំងប្រដាប់អាវុធ មានសុខសុវត្ថិភាព សុភមង្គល និងសុខភាពល្អគ្រប់ៗគ្នា៕ ដោយ៖ ប៉ៃ សុឃីម