ដំណើរវិលត្រឡប់របស់វីរកងទ័ពមកកាន់លំនៅឋាន នៅខេត្តស្ទឹងត្រែង ភូមិកំណើតរបស់ខ្លួន មានប្រជាជនរាប់ពាន់នាក់ឈរអបអរសាទរ

ប្រជាជនរាប់ពាន់នាក់ បានឈរតាមដងផ្លូវ ដើម្បីទទួលអបអរសាទរដំណើរវិលត្រឡប់មកកាន់លំនៅឋានរបស់វីរកងទ័ព នៅទឹកដីខេត្តស្ទឹងត្រែង កាលពីរសៀលថ្ងៃទី៣ ខែមករា ឆ្នាំ២០២៦។ ទិដ្ឋភាពទាំងនេះ បានបញ្ជាក់ឲ្យឃើញពីទឹកចិត្តខ្មែររួបរួម សាមគ្គីភាព និងសេចក្តីស្រលាញ់ខ្មែរ ចំពោះខ្មែរគ្នាឯង។ ប្រជាជនទាំងនោះ ស្ថិតក្នុងទឹកមុខញញឹម រីករាយ និងត្រេកអរ ខណៈដែលបានឃើញវីរកងទ័ពវិលត្រឡប់មកជួបជុំជាមួយគ្រួសារ បងប្អូន និងសាច់ញាតិ ដែលពួកគេបានរង់ចាំយ៉ាងអន្ទះសារ អស់រយៈពេលជាច្រើនខែកន្លងមកនេះ។ ក្នុងឱកាសនេះ អ្នកនាំពាក្យរដ្ឋបាលខេត្តស្ទឹងត្រែង លោក ម៉ែន គុង បានថ្លែងឲ្យដឹងថា វីរកងទ័ពមានចំនួន ៤ នាក់ ដែលមានលំនៅឋាននៅខេត្តស្ទឹងត្រែង បានអញ្ជើញវិលត្រឡប់មកកាន់លំនៅឋានរបស់ខ្លួនវិញនៅពេលនេះ។ លោកបានបន្ថែមទៀតថា ក្នុងចំណោមវីរកងទ័ពសរុប ១៨ នាក់ មានចំនួន ១៥ នាក់ បម្រើការងារជាកងទ័ពនៅកងពលតូចអន្តរាគមន៍លេខ ១២៨ ចំណុះភូមិភាគ ១ ខេត្តស្ទឹងត្រែង។ ក្នុងចំណោមវីរកងទ័ពទាំង ១៥ នាក់នោះ មានចំនួន ១១ នាក់ បានវិលត្រឡប់ទៅជួបជុំគ្រួសារនៅស្រុកកំណើតរៀងៗខ្លួនក្នុងខេត្តផ្សេងៗ ខណៈវីរកងទ័ពចំនួន ៤ នាក់ មានលំនៅឋាននៅក្នុងខេត្តស្ទឹងត្រែង៕ ដោយ៖ ប៉ៃ សុឃីម