ពាក់ព័ន្ធការឆបោកតាមអនឡាញ! បណ្ដេញជនជាតិចិន ៣១៩ នាក់ចេញពីកម្ពុជា

ជនជាតិចិន ចំនួន៣១៩នាក់ ក្នុងនោះស្រី១នាក់ ដែលពាក់ព័ន្ធករណីឆបោកតាមប្រព័ន្ធអនឡាញ ត្រូវបានបណ្តេញចេញពីកម្ពុជានៅយប់ថ្ងៃទី៩ ខែកុម្ភៈ តាមរយៈយន្តហោះពិសេស ក្រោមកិច្ចសហការវាងអាជ្ញាធរកម្ពុជា សហការជាមួយស្ថានទូតចិននៅកម្ពុជា។ នេះបើតាមការចុះផ្សាយរបស់អគ្គនាយកដ្ឋានអន្តោប្រវេសន៍។ អគ្គនាយកដ្ឋានអន្តោប្រវេសន៍ គូសបញ្ជាក់ថា ការបណ្ដេញចេញជនជាតិចិនទាំងនេះ គឺបញ្ជាក់ពីកិច្ចខិតខំប្រឹងប្រែងបោសសម្អាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា របស់រាជរដ្ឋាភិបាលកម្ពុជា ដែលបានដាក់ចេញនូវវិធានការ និងយុទ្ធនាការយ៉ាងម៉ឺងម៉ាត់ ធ្វើយ៉ាងណាធានា និងការពារសុវត្ថិភាពជូនពលរដ្ឋ និងប្រឆាំងដាច់ខាតដោយគ្មានការលើកលែងឡើយ ចំពោះមេខ្លោងដែលនៅពីក្រោយ។ យុទ្ធនាការបោសសម្អាត និងលុបបំបាត់ឧក្រិដ្ឋកម្មតាមអនឡាញរបស់រាជរដ្ឋាភិបាលកម្ពុជា ក៏នឹងជួយសង្គ្រោះជនរងគ្រោះ ដែលត្រូវបានបោកបញ្ឆោតឱ្យមកប្រព្រឹត្តឧក្រិដ្ឋកម្មនេះ ឱ្យមានសេរីភាព និងអាចវិលត្រឡប់ទៅប្រទេសពួកគេវិញ៕ ដោយ៖ ចិន្តា ទីទិ