ដើម្បីពង្រឹងសុវត្ថិភាពជូនភ្ញៀវទេសចរ កម្លាំងនគរបាលចរាចរណ៍ផ្លូវទឹក ខេត្តព្រះសីហនុ ចុះត្រួតពិនិត្យបច្ចេកទេសជលយានយន្ត

ខេត្តព្រះសីហនុ៖ កម្លាំងជំនាញនគរបាលចរាចរណ៍ផ្លូវទឹក នៃស្នងការដ្ឋាននគរបាលខេត្តព្រះសីហនុ បានបន្តសកម្មភាពចុះត្រួតពិនិត្យលក្ខណៈបច្ចេកទេសជលយានយន្តដឹកជញ្ជូនទេសចរណ៍ ដើម្បីធានាសន្តិសុខ សុវត្ថិភាព និងសណ្តាប់ធ្នាប់តាមដងផ្លូវទឹក។ នៅព្រឹកថ្ងៃទី ២៥ ខែកុម្ភៈ ឆ្នាំ ២០២៦ នេះ កម្លាំងការិយាល័យនគរបាលចរាចរណ៍ផ្លូវទឹក បានចុះត្រួតពិនិត្យជលយានយន្តដែលធ្វើអាជីវកម្មដឹកជញ្ជូនភ្ញៀវទេសចរ ធ្វើដំណើរកម្សាន្តទៅតាមបណ្តាកោះនានា។ កិច្ចប្រតិបត្តិការនេះ អនុវត្តតាមអនុសាសន៍ដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងការចង្អុលណែនាំផ្ទាល់ពី ឯកឧត្តម ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ។ គោលបំណងសំខាន់នៃការត្រួតពិនិត្យនេះ ផ្តោតលើចំណុចបច្ចេកទេស និងវិធានការសុវត្ថិភាព រួមមាន៖ ពិនិត្យលក្ខណៈបច្ចេកទេស ដើម្បីធានាថាជលយានយន្តមានសភាពរឹងមាំ និងម៉ាស៊ីនដំណើរការល្អ, ត្រួតពិនិត្យអាវពោង និងឧបករណ៍សង្គ្រោះបន្ទាន់ឱ្យមានគ្រប់គ្រាន់តាមចំនួនភ្ញៀវ, ទប់ស្កាត់ការដឹកភ្ញៀវលើសកំណត់ ដែលអាចបង្កគ្រោះថ្នាក់ជាយថាហេតុ, បង្កើនទំនុកចិត្តជូនភ្ញៀវទេសចរជាតិ និងអន្តរជាតិ ដែលមកសម្រាកកម្សាន្តក្នុងខេត្តព្រះសីហនុ និងបន្តដំណើរកម្សាន្តទៅតាមបណ្តាកោះនានា។ អាជ្ញាធរមានសមត្ថកិច្ច ក៏បានអំពាវនាវដល់ម្ចាស់អាជីវកម្មជលយានយន្តទាំងអស់ ឱ្យចូលរួមគោរពច្បាប់ចរាចរណ៍ផ្លូវទឹកឱ្យបានខ្ជាប់ខ្ជួន ដើម្បីរួមចំណែកកាត់បន្ថយគ្រោះថ្នាក់ និងលើកកម្ពស់វិស័យទេសចរណ៍ក្នុងខេត្តឱ្យកាន់តែល្អប្រសើរឡើងបន្ថែមទៀត៕ ដោយ៖ ប៉ៃ សុឃីម