អាជ្ញាធរមីនកម្ពុជា អំពាវនាវឱ្យរាយការណ៍ករណីរកឃើញមីនតាមព្រំដែនដោយប្រុងប្រយ័ត្ន និងទំនួលខុសត្រូវ
អាជ្ញាធរមីនកម្ពុជាបានអំពាវនាវឱ្យរាយការណ៍ព័ត៌មានមីនតាមព្រំដែនដោយផ្អែកលើភស្តុតាង និងគាំទ្រការផ្ទៀងផ្ទាត់បច្ចេកទេសរួម ដោយបញ្ជាក់ជំហររបស់កម្ពុជាថាមិនបានដាក់មីនថ្មី។
ខ្លឹមសារប្រភព
អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន បានចេញសេចក្តីបំភ្លឺជូនសាធារណៈជន ដោយគូសបញ្ជាក់ថា ការរាយការណ៍ ឬការផ្សព្វផ្សាយព័ត៌មានណាមួយពាក់ព័ន្ធនឹងការរកឃើញមីនប្រឆាំងមនុស្សតាមបណ្តោយព្រំដែន ត្រូវអនុវត្តដោយភាពប្រុងប្រយ័ត្ន មានមូលដ្ឋានច្បាស់លាស់ និងប្រកបដោយទំនួលខុសត្រូវខ្ពស់ ដើម្បីជៀសវាងការបង្កការយល់ច្រឡំ ឬបង្កភាពតានតឹងដោយមិនចាំបាច់។
អាជ្ញាធរមីនបានបញ្ជាក់ថា កម្ពុជា នៅតែបន្តគោរព និងអនុវត្តយ៉ាងពេញលេញនូវកាតព្វកិច្ចរបស់ខ្លួនក្រោម អនុសញ្ញាហាមប្រាមមីនប្រឆាំងមនុស្ស ដោយមានជំហរច្បាស់លាស់ថា មិនបានដាក់មីនថ្មីឡើយ ហើយគោលនយោបាយរបស់កម្ពុជា ចំពោះការហាមឃាត់ការប្រើប្រាស់មីនប្រឆាំងមនុស្ស គឺមានតម្លាភាព និងមិនមានការផ្លាស់ប្តូរ។
តំបន់ព្រំដែនកម្ពុជា–ថៃ នៅតែរងការគំរាមកំហែងធ្ងន់ធ្ងរពីមីន និងសំណល់ជាតិផ្ទុះពីសង្គ្រាម ដែលបន្សល់ទុកតាំងពីជម្លោះប្រដាប់អាវុធជាច្រើនទសវត្សរ៍មកហើយ។ គ្រាប់មីន និងសំណល់ជាតិផ្ទុះត្រូវបានរកឃើញជាបន្តបន្ទាប់ ទាំងនៅភាគីកម្ពុជា និងភាគីថៃ។ ក្នុងបរិបទនេះ អាជ្ញាធរមីនបានអំពាវនាវឱ្យភាគីទាំងពីរ បន្តពង្រឹងកិច្ចសហប្រតិបត្តិការទ្វេភាគី ដើម្បីជំរុញការបោសសម្អាត និងកាត់បន្ថយហានិភ័យដល់ប្រជាពលរដ្ឋរស់នៅតំបន់ព្រំដែន។
ជាមួយគ្នានេះ អាជ្ញាធរមីនបានបញ្ជាក់ថា ការរក្សាទុកភស្តុតាង ការស៊ើបអង្កេត និងការបង្ហាញសេចក្តីសន្និដ្ឋានជាឯកតោភាគី ដោយគ្មានការផ្ទៀងផ្ទាត់បច្ចេកទេសរួម គឺមិនអាចចាត់ទុកថាជាការស្វែងរកការពិតប្រកបដោយវិជ្ជាជីវៈ និងស្មោះត្រង់បានឡើយ។ បញ្ហាមីន គឺជាបញ្ហាបច្ចេកទេស និងមនុស្សធម៌ ដែលតម្រូវឱ្យមានការសហការយ៉ាងជិតស្និទ្ធ ការត្រួតពិនិត្យរួម និងការវាយតម្លៃដោយតម្លាភាព។
អាជ្ញាធរមីនបានបញ្ជាក់បន្ថែមថា ការដោះស្រាយបញ្ហាណាមួយពាក់ព័ន្ធនឹងមីន ត្រូវអនុវត្តតាមយន្តការដែលភាគីទាំងពីរបានព្រមព្រៀងគ្នា សម្រាប់ការវាយតម្លៃ និងការផ្ទៀងផ្ទាត់បច្ចេកទេស។ កម្ពុជា ត្រៀមខ្លួនជាស្រេចក្នុងការសហការប្រកបដោយស្ថាបនា និងតម្លាភាព ដើម្បីធានាសុវត្ថិភាពជូនប្រជាពលរដ្ឋ និងសហគមន៍នៅតាមបណ្តោយព្រំដែន។
អាជ្ញាធរមីនបានសង្កត់ធ្ងន់ថា សកម្មភាពមីន មិនគួរត្រូវបានយកទៅប្រើប្រាស់ជាឧបករណ៍នយោបាយឡើយ ព្រោះវិស័យនេះមានគោលបំណងមនុស្សធម៌ ក្នុងការជួយសង្គ្រោះជីវិត កាត់បន្ថយហានិភ័យ និងលើកកម្ពស់សន្តិភាព និងការជឿទុកចិត្តគ្នាទៅវិញទៅមក។ កម្ពុជា នៅតែប្តេជ្ញាចិត្តបន្តការសន្ទនា និងកិច្ចសហប្រតិបត្តិការ ឆ្ពោះទៅរកព្រំដែនដែលមានសុវត្ថិភាព ស្ថិរភាព និងការកំណត់ខណ្ឌសីមាច្បាស់លាស់។ ដោយ៖ KPS99TV
កំណែប្រភព
{
"publishedSourceRevision": "1",
"publishedWorkingVersionId": "14837",
"languageVersionId": "10340",
"visibilityVersion": "2",
"versionToken": "a1.CDvsJ9sTB-_wuGYuUgMLmDPih6blZV_jSMawNfz2PbU"
}ការបញ្ចូលក្នុងបញ្ជីប្រភព មិនមែនជាការបញ្ជាក់ថាព័ត៌មានទាំងអស់ត្រូវបានផ្ទៀងផ្ទាត់ទេ។ សូមពិនិត្យកាលបរិច្ឆេទ និងប្រភពបច្ចុប្បន្នសម្រាប់តម្លៃ គោលនយោបាយ និងការដឹកជញ្ជូន។