អភិបាលខេត្តព្រះសីហនុ៖ មនសិការវិជ្ជាជីវៈរបស់មន្ត្រីរាជការ គឺដើម្បីបម្រើសេវាសាធារណៈឱ្យកាន់តែមានប្រសិទ្ធភាព

ខេត្តព្រះសីហនុ៖ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានណែនាំដល់មន្ត្រីគ្រប់លំដាប់ថ្នាក់ឱ្យបន្តខិតខំបំពេញភារកិច្ចតាមជំនាញរៀងៗខ្លួន ជាពិសេសអនុវត្តឱ្យបានខ្ជាប់ខ្ជួននូវគោលនយោបាយ និងយុទ្ធសាស្ត្ររបស់រាជរដ្ឋាភិបាល។ ឯកឧត្តមបានលើកឡើងដូច្នេះ ក្នុងឱកាសអញ្ជើញជាអធិបតីក្នុងកិច្ចប្រជុំពិនិត្យ និងវាយតម្លៃការអនុវត្តតួនាទីនិងភារកិច្ចរបស់មន្ត្រីរាជការ ដែលស្ថិតក្រោមរចនាសម្ព័ន្ធរដ្ឋបាលខេត្ត នៅព្រឹកថ្ងៃទី២១ ខែមេសា ឆ្នាំ២០២៦ នៅសាលាខេត្តព្រះសីហនុ។ កិច្ចប្រជុំមានការចូលរួមពីអភិបាលរងខេត្ត នាយករដ្ឋបាល ប្រធានមន្ទីរ-អង្គភាពជុំវិញខេត្ត និងមន្ត្រីពាក់ព័ន្ធជាច្រើនរូបទៀត។ កិច្ចប្រជុំបានពិនិត្យលទ្ធផលការងារដែលសម្រេចបានកន្លងមក និងបញ្ហាប្រឈមដែលអង្គភាពនីមួយៗបានជួបប្រទះ។ ឯកឧត្តមអភិបាលខេត្តបានបញ្ជាក់ថា ការគោរពវិន័យ កិច្ចសហប្រតិបត្តិការរវាងមន្ត្រី និងការលើកកម្ពស់មនសិការវិជ្ជាជីវៈរបស់មន្ត្រីរាជការ គឺដើម្បីបម្រើសេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាព។ ដោយ៖ ប៉ៃ សុឃីម