កោះរ៉ុងជាប់លេខ៩ ក្នុងបញ្ជី The World’s 50 Best Beaches ឆ្នាំ២០២៦

យោងតាមបញ្ជី The World’s 50 Best Beaches ឆ្នាំ២០២៦ កោះរ៉ុង នៅប្រទេសកម្ពុជា ជាប់ចំណាត់ថ្នាក់លេខ៩។ បើយោងតាមការបញ្ជាក់របស់លោក រាជ សុវណ្ណ អាជ្ញាធរក្រុងបានយកចិត្តទុកដាក់ខ្ពស់លើការថែរក្សាអនាម័យ និងបរិស្ថាន ដោយរៀបចំក្រុមការងារសម្អាតឆ្នេរជាប្រចាំ នៅតាមតំបន់សំខាន់ៗ។ កិច្ចការនេះក៏ទទួលបានការចូលរួមយ៉ាងសកម្មពីវិស័យឯកជនផងដែរ ដែលបានជួយធ្វើឲ្យឆ្នេរសមុទ្រមានសោភ័ណភាពស្អាត និងទាក់ទាញភ្ញៀវទេសចរ។ ជាមួយគ្នានេះ ភ្ញៀវទេសចរជាតិ និងអន្តរជាតិ ដែលទៅកម្សាន្តនៅកោះរ៉ុង ក៏បានចូលរួមរក្សាអនាម័យ ដោយបោះសំរាមត្រឹមត្រូវទៅក្នុងធុងដែលអាជ្ញាធរបានរៀបចំដាក់នៅតាមទីតាំងនានា។ អាជ្ញាធរបានអនុវត្តវិធានការយ៉ាងតឹងរឹង ក្នុងការទប់ស្កាត់ការបំពុលបរិស្ថាន ជាពិសេសការបង្ហូរកាកសំណល់រាវចូលទៅក្នុងសមុទ្រ។ វិធានការទាំងនេះទទួលបានការគាំទ្រពីរាជរដ្ឋាភិបាល និងក្រសួងស្ថាប័នពាក់ព័ន្ធ ទាំងផ្នែកបច្ចេកទេស និងថវិកា ដើម្បីធានាថា ឆ្នេរខ្សាច់ និងទឹកសមុទ្រនៅតែស្អាត និងមានគុណភាពល្អ។ បន្ថែមពីនេះ អាជ្ញាធរក្រុងកោះរ៉ុង ក៏បានចុះផ្សព្វផ្សាយជាបន្តបន្ទាប់ទៅកាន់ប្រជាពលរដ្ឋ និងម្ចាស់អាជីវកម្ម ឲ្យចូលរួមថែរក្សាបរិស្ថាន ដោយមិនបង្ហូរកាកសំណល់រាវចូលសមុទ្រ និងត្រូវមានប្រព័ន្ធចម្រោះទឹកស្អុយឲ្យបានត្រឹមត្រូវ។ វិធានការទាំងនេះ គឺជាចំណុចសំខាន់ក្នុងការរក្សាឲ្យឆ្នេរសមុទ្រកោះរ៉ុងមានសោភ័ណភាពស្អាត បរិសុទ្ធ និងអាចទាក់ទាញភ្ញៀវទេសចរបានយូរអង្វែង៕ ដោយ៖ ប៉ៃ សុឃីម