រដ្ឋមន្ត្រីវប្បធម៌បង្ហាញជំហរកម្ពុជាជូនអង្គទូតអំពីស្ថានភាពប្រាសាទតាមព្រំដែន

នៅរសៀលថ្ងៃទី២២ ខែឧសភា ឆ្នាំ២០២៦ ប្រធាន និងតំណាងបេសកកម្មការទូត និងអង្គការអន្តរជាតិប្រចាំកម្ពុជាចំនួន៤៤រូប បានចូលរួមស្តាប់បទបង្ហាញនៅទីស្តីការក្រសួងការបរទេស។ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានលើកឡើងពីជំហរកម្ពុជាចំពោះការបំផ្លិចបំផ្លាញ និងការកាន់កាប់តំបន់ប្រាសាទដោយភាគីថៃ។ លោកជំទាវបានថ្លែងថា ប្រាសាទព្រះវិហារ ដែលជាតំបន់បេតិកភណ្ឌពិភពលោករបស់អង្គការយូណេស្កូ បានរងការបំផ្លិចបំផ្លាញយ៉ាងធ្ងន់ធ្ងរ។ តាមលោកជំទាវ ភឿង សកុណា ចាប់តាំងពីមានកិច្ចព្រមព្រៀងបទឈប់បាញ់ ភាគីថៃបានកាន់កាប់តំបន់បណ្តុំប្រាសាទតាមាន់ ប្រាសាទតាក្របី និងប្រាសាទខ្នារ ហើយធ្វើសកម្មភាពជាច្រើន រួមមានពិធីសាសនា ដំណើរទស្សនកិច្ចរបស់សមាជិកគណៈរដ្ឋមន្ត្រីថៃ ការជួសជុលដោយគ្មានការអនុញ្ញាត ការដាក់ប្រាសាទទាំងនោះក្នុងបញ្ជីសារពើភណ្ឌបេតិកភណ្ឌជាតិរបស់ថៃ និងការសាងសង់សំណង់អចិន្ត្រៃយ៍ ដូចជាព្រះពុទ្ធបដិមាធំៗ។ ទោះបីជាយ៉ាងណា លោកជំទាវរដ្ឋមន្រ្តី បញ្ជាក់ថា កម្ពុជាបានដាក់កំណត់ទូតតវ៉ាជាច្រើន ហើយក៏នឹងបន្តប្រឆាំងដាច់ខាត់ចំពោះសកម្មភាពខុសច្បាប់បែបនេះរបស់ថៃដែលប៉ុនប៉ងបង្កើតស្ថានភាពលើដីជាក់ស្តែង និងព្យាយាមជំរុញការទាមទារ ដែលពុំមានមូលដ្ឋានទាំងអង្គហេតុនិងអង្គច្បាប់ចំពោះបេតិកភណ្ឌវប្បធម៌ខ្មែរ។ លោកជំទាវ ក៏បានថ្លែងអំណរគុណដល់ប្រធាន និងតំណាងបេសកកម្មការទូត និងអង្គការអន្តរជាតិចំពោះការគាំទ្រជាបន្តបន្ទាប់ចំពោះការដោះស្រាយជម្លោះព្រំដែនកម្ពុជា-ថៃដោយសន្តិវិធី។ រដ្ឋមន្រ្តីវប្បធម៌ បញ្ជាក់ជាថ្មីនូវការប្តេជ្ញាចិត្តដ៏ខ្ជាប់ខ្ជួនរបស់កម្ពុជាក្នុងការដោះស្រាយវិវាទព្រំដែនជាមួយប្រទេសថៃ តាមរយៈមធ្យោបាយសន្តិវិធី អនុលោមតាមច្បាប់អន្តរជាតិ និងកិច្ចព្រមព្រៀងទ្វេភាគី ព្រមទាំងបញ្ជាក់ថា សន្តិភាពរវាងកម្ពុជានិងថៃ មានសារៈសំខាន់សម្រាប់សុខដុមរមនា សាមគ្គីភាព និងវឌ្ឍនភាពរបស់អាស៊ាន និងតំបន់ទាំងមូល៕ ដោយ៖ ង៉ែត ពិសាន្ត