អ្នកជំនាញកម្ពុជាចូលរួមពង្រឹងកិច្ចសហប្រតិបត្តិការតំបន់ ដើម្បីការពារបេតិកភណ្ឌពិភពលោក

តំណាងអ្នកជំនាញបេតិកភណ្ឌពិភពលោកកម្ពុជាចំនួន២រូប មកពីអាជ្ញាធរជាតិព្រះវិហារ និងអាជ្ញាធរជាតិសំបូរព្រៃគុក ចាប់ពីថ្ងៃទី២៧ ខែកញ្ញា ដល់ថ្ងៃទី១ ខែតុលា ឆ្នាំ២០២៦ ក្រោមកិច្ចសហការ និងការសម្របសម្រួលពីគណៈកម្មការជាតិយូណេស្កូកម្ពុជា បានចូលរួមកិច្ចសន្ទនាថ្នាក់តំបន់ស្តីពី “Asia-Pacific Dialogue on Heritage and Authenticity” នៅទីក្រុងហាណូយ និងនិញប៊ិញ នៃសាធារណរដ្ឋសង្គមនិយមវៀតណាម។ វេទិកាតំបន់នេះបានផ្តល់ឱកាសដល់អ្នកជំនាញកម្ពុជា ចែករំលែកបទពិសោធន៍ និងផ្លាស់ប្តូរចំណេះដឹងជាមួយអ្នកជំនាញអន្តរជាតិ ពាក់ព័ន្ធនឹងការអភិរក្ស ការស្តារបេតិកភណ្ឌ និងការរក្សាភាពយថភាពរបស់សម្បត្តិបេតិកភណ្ឌ។ កិច្ចពិភាក្សាក៏បានផ្តោតលើសារៈសំខាន់នៃការចូលរួមរបស់សហគមន៍ ក្នុងការថែរក្សាតម្លៃ និងអត្តសញ្ញាណរបស់បេតិកភណ្ឌឱ្យបានគង់វង្ស។ តាមរយៈការចូលរួមពិភាក្សា និងការរួមចំណែករបស់អ្នកជំនាញកម្ពុជា ក្នុង “The Ha Noi Outcome Document” កម្ពុជាបានបង្ហាញពីការចូលរួមក្នុងកិច្ចខិតខំប្រឹងប្រែងរួមកម្រិតតំបន់ ដើម្បីពង្រឹងការការពារ និងការគ្រប់គ្រងបេតិកភណ្ឌពិភពលោក។ កិច្ចសហប្រតិបត្តិការនេះក៏ជាផ្នែកមួយនៃការជំរុញការអភិរក្សបេតិកភណ្ឌប្រកបដោយនិរន្តរភាព សម្រាប់មនុស្សជំនាន់បច្ចុប្បន្ន និងអនាគត។ ដោយ៖ សុភ័ក្រ្ត