សម្ដេចធិបតី៖ ការរក្សាជីវិតប្រជាពលរដ្ឋ គឺជាអាទិភាពខ្ពស់បំផុតរបស់រាជរដ្ឋាភិបាល

សម្ដេចធិបតីបានគូសបញ្ជាក់ថា ក្នុងពេលដែលប្រទេសកំពុងប្រឈមមុខនឹងស្ថានការណ៍លំបាកពីរផ្នែក គឺសង្គ្រាមឈ្លានពាន និងគ្រោះទឹកជំនន់ រាជរដ្ឋាភិបាលត្រូវដាក់ការពារជីវិតប្រជាពលរដ្ឋជាកិច្ចការអាទិភាពជាងគេ។ សម្ដេចធិបតីបានសង្កត់ធ្ងន់ថា នៅពេលមានគ្រោះថ្នាក់កើតឡើង ការសង្គ្រោះមនុស្សត្រូវធ្វើជាមុន ដោយមិនគួរយកទ្រព្យសម្បត្តិ ឬសម្ភារៈមកពិចារណាជាអាទិភាពឡើយ។ សម្ដេចធិបតីបានលើកឡើងថា ប្រសិនបើមានការវាយប្រហារ និងគ្រាប់ផ្លោងធ្លាក់ចូលតំបន់ប្រជាជន អាជ្ញាធរត្រូវប្រញាប់ជម្លៀសពួកគេចេញទៅកាន់ទីតាំងមានសុវត្ថិភាព។ ចំពោះស្ថានភាពទឹកជំនន់វិញ នៅពេលទឹកហូរចូល និងបង្កគ្រោះថ្នាក់ ការងារសំខាន់គឺត្រូវចូលទៅជួយសង្គ្រោះ និងនាំប្រជាពលរដ្ឋចេញពីតំបន់ប្រឈមឱ្យបានឆាប់រហ័ស ដើម្បីរក្សាជីវិតជាមុនសិន។ សម្ដេចធិបតីបានបញ្ជាក់ថា គោលការណ៍អាទិភាពរបស់រាជរដ្ឋាភិបាល គឺ ទី១ ជីវិត និងទី២ សុខទុក្ខរបស់ប្រជាពលរដ្ឋ។ ការដាក់ជីវិតជាចម្បង មានន័យថា ត្រូវធានាឱ្យប្រជាជនរួចផុតពីកន្លែងគ្រោះថ្នាក់ និងទៅដល់ទីសុវត្ថិភាពជាមុន ខណៈការព្រួយបារម្ភអំពីការខូចខាតទ្រព្យសម្បត្តិអាចដោះស្រាយជាបន្តបន្ទាប់នៅពេលក្រោយ។