ក្រោយពីក្រសួងអប់រំសង្កេតឃើញមានគ្រឹះស្ថានសិក្សាមួយចំនួនមិនទាន់អនុវត្តបានល្អចំពោះការណែនាំស្តីពីការហាមឃាត់ការប្រើប្រាស់ ការចែកចាយ ការតាំងលក់ និងការផ្សព្វផ្សាយពាណិជ្ជកម្មផលិតផលគ្រឿងស្រវឹងក្នុងបរិវេណគ្រឹះស្ថានសិក្សាសាធារណៈនិងឯកជន។ ក្រសួងអប់រំ យុវជន និងកីឡា បានណែនាំឱ្យមន្ទីរអប់រំ និងគ្រឹះស្ថានសិក្សានៅទូទាំងប្រទេសត្រូវសហការជាមួយស្ថាប័នពាក់ព័ន្ធ អាជ្ញាធរមានសមត្ថកិច្ចគ្រប់លំដាប់ថ្នាក់ ដើម្បីធ្វើឱ្យ«គ្រឹះស្ថានសិក្សាគ្មានគ្រឿងស្រវឹង»។
តាមសេចក្តីណែនាំរបស់ក្រសួងអប់រំ ដើម្បីធ្វើឱ្យ«គ្រឹះស្ថានសិក្សាគ្មានគ្រឿងស្រវឹង» នោះមន្ទីរអប់រំនៅទូទាំងប្រទេស ត្រូវហាមឃាត់ដាច់ខាតរាល់ការប្រើប្រាស់ ការចែកចាយ ការតាំងលក់ និងការផ្សព្វផ្សាយពាណិជ្ជកម្មផលិតផលគ្រឿងស្រវឹងគ្រប់ប្រភេទ និងគ្រប់រូបភាពនៅក្នុងនិងក្រៅបរិវេណជុំវិញគ្រឹះស្ថានសិក្សា, ហាមដាច់ខាតការសេពគ្រឿងស្រវឹងគ្រប់ប្រភេទនៅក្នុងបរិវេណគ្រឹះស្ថានសិក្សា និងត្រូវផ្សព្វផ្សាយខ្លឹមសារផលប៉ះពាល់នៃការសេពគ្រឿងស្រវឹងនៅពេលគោរពទង់ជាតិ កិច្ចប្រជុំ ឬកម្មវិធីប្រមូលផ្តុំផ្សេងៗរបស់គ្រឹះស្ថានសិក្សា។
មន្ទីអប់រំ និងគ្រឹះស្ថានសិក្សានៅទូទាំងប្រទេសត្រូវក្រើនរំលឹកជាប្រចាំនូវបទប្បញ្ញត្តិនានាដែលពាក់ព័ន្ធនឹងការហាមឃាត់ការប្រើប្រាស់ ការចែកចាយ ការតាំងលក់ និងការផ្សព្វផ្សាយពាណិជ្ជកម្មផលិតផលគ្រឿងស្រវឹងដល់សិស្សានុសិស្ស និងបុគ្គលិកអប់រំ និងត្រូវកំណត់ការហាមឃាត់នូវការប្រើប្រាស់ ការចែកចាយ ការតាំងលក់ និងការផ្សព្វផ្សាយពាណិជ្ជកម្មផលិតផលគ្រឿងស្រវឹងគ្រប់ប្រភេទក្នុងបទបញ្ជាផ្ទៃក្នុងរបស់គ្រឹះស្ថានសិក្សា។ លើសពីនេះ ត្រូវអប់រំ និងផ្សព្វផ្សាយអំពីខ្លឹមសារនៃការហាមឃាត់ដាច់ខាតរាល់ការប្រើប្រាស់ ការចែកចាយ ការតាំងលក់ និងការផ្សព្វផ្សាយពាណិជ្ជកម្មផលិតផលគ្រឿងស្រវឹងគ្រប់ប្រភេទនៅក្នុងនិងក្រៅបរិវេណជុំវិញគ្រឹះស្ថានសិក្សាដល់អ្នកសិក្សា និងបុគ្គលិកអប់រំក្នុងឆ្នាំសិក្សានីមួយៗ, ត្រូវមានចលនា និងរៀបចំកម្មវិធីអប់រំនានា ដូចជាការផលិតស្លាកសញ្ញា ឬសារអប់រំ ការប្រកួតប្រជែងគំនូរដែលមានខ្លឹមសារហាមឃាត់ការប្រើប្រាស់គ្រឿងស្រវឹង រួចដាក់តាំង ឬបិទផ្សាយនៅក្នុងនិងជុំវិញបរិវេណគ្រឹះស្ថានសិក្សា។
ចំណុចសំខាន់នោះគឺ ត្រូវតាមដានរាល់សកម្មភាពការប្រើប្រាស់ ការចែកចាយ ការលក់ដូរ ការផ្សព្វផ្សាយពាណិជ្ជកម្មផលិតផលគ្រឿងស្រវឹងគ្រប់ប្រភេទនៅក្នុងនិងជុំវិញបរិវេណគ្រឹះស្ថានសិក្សា ដើម្បីមានវិធានការដោះស្រាយ និងធ្វើរបាយការណ៍វឌ្ឍនភាពនៃការអនុវត្តសេចក្តីណែនាំនេះប្រចាំឆមាស និងប្រចាំឆ្នាំរួចបញ្ជូនមកក្រសួងអប់រំ។ យ៉ាងណា ក្រសួងអប់រំ ក៏សង្កេតឃើញគ្រឹះស្ថានសិក្សាភាគច្រើនអនុវត្តបានល្អប្រសើរតាមស្មារតីនៃការណែនាំស្តីពីការហាមឃាត់ការប្រើប្រាស់ ការចែកចាយ ការតាំងលក់ និងការផ្សព្វផ្សាយពាណិជ្ជកម្មផលិតផលគ្រឿងស្រវឹងក្នុងបរិវេណគ្រឹះស្ថានសិក្សាសាធារណៈនិងឯកជនដែរ៕
ទូរទស្សន៍ខេត្តព្រះសីហនុ ដោយ៖ ង៉ែត ពិសាន្ត
