ថ្មីៗនេះ បុរសជនជាតិចិនអាយុ ៣៤ ឆ្នាំម្នាក់ បានបង្កហេតុពេលស្រវឹងនៅជាន់ទី៣ នៃកាស៊ីណូមួយនៅ Genting ប្រទេសម៉ាឡេស៊ី ដោយសង្ស័យថាបានបំផ្លាញឧបករណ៍កាស៊ីណូ និងវាយមន្ត្រីនគរបាលជំនួយម្នាក់ឱ្យរងរបួស។ នគរបាលបានចាប់ខ្លួនរូបគេដើម្បីស៊ើបអង្កេត។
តាមសេចក្ដីរាយការណ៍ បុរសរូបនេះបានបាត់បង់ការគ្រប់គ្រងអារម្មណ៍ ហើយយកក្បាលបុកម៉ាស៊ីនល្បែង បណ្ដាលឱ្យខូចអេក្រង់ម៉ាស៊ីនចំនួន៣ និងកៅអីចំនួន២។ កាស៊ីណូប៉ាន់ប្រមាណការខូចខាតប្រហែល ៨៥,០០០ រីងហ្គីត។ ក្នុងពេលកើតហេតុ បុរសរូបនេះក៏បានស្រែកថា «ខ្ញុំជាជនជាតិចិន»។ នៅពេលមន្ត្រីនគរបាលជំនួយអាយុ ៣២ ឆ្នាំម្នាក់ចូលទៅឃាត់ គាត់ត្រូវបុរសរូបនេះដាល់ចំមាត់ បណ្ដាលឱ្យបាក់ធ្មេញ២។ បុរសបង្កហេតុក៏បានរងរបួសថ្ងាស ហើយបានទទួលការព្យាបាល និងដេរ៦ថ្នេរ។
ការស៊ើបអង្កេតបឋមរបស់នគរបាលបង្ហាញថា បុរសរូបនេះស្ថិតក្នុងស្ថានភាពស្រវឹងនៅពេលកើតហេតុ និងបានបង្ហាញអាកប្បកិរិយាឈ្លានពានដល់អ្នកដំណើររួចហើយ មុនចូលកាស៊ីណូ។ នគរបាលបាននិយាយថា ការធ្វើតេស្តទឹកនោមមិនរកឃើញសារធាតុញៀន ហើយបុរសរូបនេះក៏មិនមានប្រវត្តិបទល្មើសដែរ។
បច្ចុប្បន្ន ករណីនេះកំពុងត្រូវបានស៊ើបអង្កេតតាមបទប្បញ្ញត្តិនៃក្រមព្រហ្មទណ្ឌម៉ាឡេស៊ី ពាក់ព័ន្ធនឹងការបង្ករបួសដោយចេតនា និងការបំផ្លាញទ្រព្យសម្បត្តិដោយចេតនា។ នគរបាលកំពុងប្រមូលរូបភាពពីកាមេរ៉ាសុវត្ថិភាព កត់ត្រាសក្ខីកម្មរបស់សាក្សី និងស្នើសុំពន្យារពេលឃុំខ្លួន ដើម្បីបញ្ជាក់អង្គហេតុបន្ថែម។ នគរបាលបានបញ្ជាក់ថា នឹងចាត់ការតាមច្បាប់ ដោយមិនប្រកាន់សញ្ជាតិរបស់អ្នកពាក់ព័ន្ធឡើយ។
