អាជ្ញាធរអន្តោប្រវេសន៍ថៃបានឃាត់អ្នកសង្ស័យម្នាក់ដែលត្រូវពិពណ៌នាថាជា «មេធំនៃក្រុមឆបោកចិន» នៅអាកាសយានដ្ឋានអន្តរជាតិសុវណ្ណភូមិ ខណៈព្យាយាមចាកចេញពីប្រទេស។ គាត់ត្រូវសង្ស័យឆបោកជនរងគ្រោះចិនជាង៥០០នាក់ ក្នុងករណីពាក់ព័ន្ធប្រាក់លើស២០០លានយន់។
មន្ត្រីអន្តោប្រវេសន៍រកឃើញថា គាត់ត្រៀមចេញដោយប្រើលិខិតឆ្លងដែនម៉ិកស៊ិកក្លែង ក្រោមឈ្មោះ «Mr. GOL» ហើយលាក់លិខិតឆ្លងដែនចិនពិតក្នុងឥវ៉ាន់ជាប់ខ្លួន។ ប៉ូលិសអន្តោប្រវេសន៍បានទាក់ទងមន្ត្រីទំនាក់ទំនងប៉ូលិសនៃស្ថានទូតចិននៅថៃ។ ក្រោយផ្ទៀងផ្ទាត់ ប៉ូលិសកំណត់ថាគាត់ជាអ្នកសង្ស័យសំខាន់ក្នុងក្រុមឆបោកឆ្លងដែន ដែលប៉ូលិសចិនកំពុងតាមចាប់។
តាមអ្នកស៊ើបអង្កេត អ្នកសង្ស័យត្រកូលHuangបានរត់ពីខេត្តយូណានប្រទេសចិន តាមផ្លូវខុសច្បាប់ចូលមីយ៉ាន់ម៉ាតាំងពីឆ្នាំ២០២០។ ចន្លោះឆ្នាំ២០២២–២០២៤ គាត់និងក្រុមឧក្រិដ្ឋកម្មត្រូវបានចោទថាបង្កើតមូលដ្ឋានឆបោកនៅម្យ៉ាវ៉ាឌី។ ក្រុមនេះប្រើវេទិកាវិនិយោគក្លែង និងក្លែងខ្លួនលើបណ្ដាញសង្គមជា «អ្នកជំនួញជោគជ័យ មានទ្រព្យ និងនៅលីវ»។ ពួកគេទាញទំនុកចិត្តដំបូងដោយប្រាក់ចំណេញខ្ពស់ បន្ទាប់មកបិទវេទិកាហើយគេចយកប្រាក់ បណ្ដាលឱ្យជនរងគ្រោះចិនជាង៥០០នាក់ខាតបង់ធ្ងន់។
រាយការណ៍សរុបដោយស្ថានីយយើង
