ខេត្តព្រះសីហនុ៖ ដើម្បីបង្កលក្ខណៈងាយស្រួល និងខិតជិតដល់ប្រជាពលរដ្ឋ ជាពិសេសស្របតាមតម្រូវការចាំបាច់របស់យុវជន នៅព្រឹកថ្ងៃទី ២៥ ខែកុម្ភៈ ឆ្នាំ ២០២៦ នេះ កម្លាំងការិយាល័យអត្តសញ្ញាណបណ្ណសញ្ជាតិខ្មែរ សហការជាមួយកម្លាំងអធិការដ្ឋាននគរបាលក្រុងព្រះសីហនុ បានចុះជួយបំពេញបែបបទផ្តល់អត្តសញ្ញាណបណ្ណសញ្ជាតិខ្មែរ ជូនដល់សិស្សានុសិស្ស (ដែលគ្រប់អាយុត្រូវធ្វើអត្តសញ្ញាណបណ្ណ) លោកគ្រូ អ្នកគ្រូ នៅទីតាំងវិទ្យាល័យ ហ៊ុន សែន មិត្តភាព (អូរ២) ក្រុងព្រះសីហនុ។
សកម្មភាពដ៏មានសារៈសំខាន់នេះ ត្រូវបានអនុវត្តឡើងតាមអនុសាសន៍ដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងការចង្អុលណែនាំជាប្រចាំពីសំណាក់ ឯកឧត្តម ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ។
គោលបំណងនៃការចុះផ្តល់សេវានេះ គឺដើម្បីជួយសម្រួលដល់សិស្សានុសិស្ស ដែលរវល់ការសិក្សា មិនមានពេលវេលាគ្រប់គ្រាន់ក្នុងការធ្វើដំណើរទៅកាន់ទីស្នាក់ការអត្តសញ្ញាណបណ្ណ និងដើម្បីត្រៀមលក្ខណៈឱ្យបានរួចរាល់ សម្រាប់ការប្រើប្រាស់ក្នុងតម្រូវការសិក្សា ក៏ដូចជាការងាររដ្ឋបាលផ្សេងៗ។
សូមបញ្ជាក់ថា យុទ្ធនាការចុះផ្តល់សេវានេះ នឹងប្រព្រឹត្តទៅក្នុងរយៈពេល ០២ថ្ងៃពេញ ចាប់ពីថ្ងៃទី ២៥ ដល់ថ្ងៃទី ២៦ ខែកុម្ភៈ ឆ្នាំ ២០២៦៕ ដោយ៖ ប៉ៃ សុឃីម
