ខេត្តព្រះសីហនុ៖ មន្ទីរកិច្ចការនារីខេត្តព្រះសីហនុ បានបើកវគ្គបណ្តុះបណ្តាលស្តីពី «គោលការណ៍ណែនាំអំពីកិច្ចការពារផ្លូវច្បាប់សម្រាប់សិទ្ធិស្ត្រី និងកុមារនៅកម្ពុជា និងការឆ្លើយតបសេវាក្នុងវិស័យសុខាភិបាល» នាព្រឹកថ្ងៃទី២ ខែមីនា ឆ្នាំ២០២៦ ក្រោមការចូលរួមពី លោកជំទាវ ប្រាក់ ច័ន្ទសុខា សមាជិកក្រុមប្រឹក្សាខេត្ត, លោកស្រី ម៉ាក សំណាង អភិបាលរងខេត្ត, លោកស្រី សៅ កាន់ ប្រធានមន្ទីរកិច្ចការនារីខេត្ត និងលោកស្រី ស ស៊ីណែត ប្រធាននាយកដ្ឋានការពារផ្លូវច្បាប់ នៃក្រសួងកិច្ចការនារី។
លោកស្រី ម៉ាក សំណាង អភិបាលរងខេត្ត បានមានប្រសាសន៍ថា វគ្គបណ្តុះបណ្តាលនេះផ្តោតលើមន្ត្រីសំខាន់ៗដែលពាក់ព័ន្ធនឹងការដោះស្រាយអំពើហិង្សាលើស្ត្រី និងក្មេងស្រី ដើម្បីជួយគាំទ្រដល់ជនរងគ្រោះ។ អ្នកចូលរួមរួមមាន ព្រះរាជអាជ្ញា ចៅក្រមស៊ើបសួរ និងជំនុំជម្រះ មន្ត្រីនគរបាល មេធាវី មន្ទីរពេទ្យបង្អែក មណ្ឌលសុខភាព មន្ទីរកិច្ចការនារីខេត្ត ក្រុង ស្រុក ឃុំ មេឃុំ មេភូមិ និងអង្គការសង្គមកិច្ច។
ការគាំទ្រដំបូង គឺជាការថែទាំដ៏សំខាន់បំផុតដែលអាចផ្តល់ជូនជនរងគ្រោះបាន។ វាអាចជាឱកាសតែមួយក្នុងការផ្តល់ការថែទាំ និងការឆ្លើយតបជាក់ស្តែងស្របតាមតម្រូវការរបស់ជនរងគ្រោះ នៅពេលមានទំនាក់ទំនងដំបូង។ វាជាជំហានដំបូងសម្រាប់ការគាំទ្រយូរអង្វែង និងការលើកទឹកចិត្ត។ ប្រសិនបើមិនផ្តល់ការគាំទ្របានត្រឹមត្រូវ និងទាន់ពេលវេលា ជនរងគ្រោះអាចបាត់បង់ទំនុកចិត្ត និងមិនត្រឡប់មកស្វែងរកសេវាសុខាភិបាលវិញ។
គោលបំណងនៃការស្តាប់ គឺផ្តល់ឱកាសឱ្យស្ត្រីនិយាយអំពីអ្វីដែលគាត់ចង់និយាយ នៅកន្លែងឯកជន និងមានសុវត្ថិភាព ជាមួយអ្នកផ្តល់សេវាថែទាំសុខភាព។ សកម្មភាពនេះមានសារៈសំខាន់ណាស់ ក្នុងការជួយឱ្យជនរងគ្រោះមានអារម្មណ៍ប្រសើរឡើងវិញ។
ការគាំទ្រផ្នែកសុខភាពផ្លូវចិត្ត ក៏មានសារៈសំខាន់សម្រាប់ជនរងគ្រោះដោយសារអំពើហិង្សា និងសម្រាប់អ្នកផ្តល់សេវាថែទាំសុខភាពផងដែរ។ ជនរងគ្រោះទាំងអស់មានសិទ្ធិស្មើគ្នា ក្នុងការទទួលបានការគាំទ្រ និងសេវាដូចគ្នា ដោយមិនមានការរើសអើង ឬការប្រព្រឹត្តផ្សេងគ្នា ពីព្រោះជាតិពន្ធុ សាសនា វណ្ណៈសង្គម ពិការភាព អាយុ ចំណង់ចំណូលចិត្តផ្លូវភេទ ឬកត្តាផ្សេងទៀតឡើយ។
លោកស្រី អភិបាលរងខេត្ត បានបញ្ជាក់ថា វគ្គបណ្តុះបណ្តាលនេះ មានសារៈសំខាន់ក្នុងការពង្រឹងកិច្ចការពារផ្លូវច្បាប់សម្រាប់សិទ្ធិស្ត្រី និងកុមារនៅកម្ពុជា ព្រមទាំងការឆ្លើយតបសេវាក្នុងវិស័យសុខាភិបាល។ លោកស្រីក៏បានស្នើឱ្យមន្ត្រីគ្រប់ភាគីពាក់ព័ន្ធយកចិត្តទុកដាក់ស្តាប់គ្រូឧទ្ទេស ដើម្បីយកទៅអនុវត្តឱ្យមានប្រសិទ្ធភាព។
ដោយ៖ ប៉ៃ សុឃីម
