រាជធានីភ្នំពេញ ថ្ងៃទី៣ ខែមីនា ឆ្នាំ២០២៦៖ ក្នុងគោលបំណងពង្រីកទីផ្សារទេសចរណ៍ និងលើកកម្ពស់កិត្តិនាមកម្ពុជាលើឆាកអន្តរជាតិ ក្រសួងការបរទេស និងសហប្រតិបត្តិការអន្តរជាតិ និងក្រសួងទេសចរណ៍ បានរួមគ្នាពង្រឹងកិច្ចសហប្រតិបត្តិការយុទ្ធសាស្ត្រ តាមរយៈបណ្តាញស្ថានទូត និងស្ថានកុងស៊ុលកម្ពុជាប្រចាំនៅបរទេស។
ក្រោមគោលការណ៍ដ៏ខ្ពង់ខ្ពស់របស់ ហ៊ុន ម៉ាណែត នាយករដ្ឋមន្ត្រី និងដោយការអនុញ្ញាតពី ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ, ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានជួបពិភាក្សាការងារជាមួយឯកអគ្គរាជទូត និងអគ្គកុងស៊ុលកម្ពុជាប្រចាំនៅបរទេសចំនួន ៤៣ រូប ដើម្បីសម្របសម្រួលការងារផ្សព្វផ្សាយវិស័យទេសចរណ៍កម្ពុជា ឱ្យកាន់តែមានប្រសិទ្ធភាព និងសមស្របតាមបរិបទអន្តរជាតិ។
កិច្ចពិភាក្សាបានផ្តោតលើយុទ្ធសាស្ត្រថ្មីៗ ដើម្បីបង្កើនភាពធន់ និងភាពប្រកួតប្រជែងរបស់វិស័យទេសចរណ៍កម្ពុជា ក្នុងបរិយាកាសភូមិសាស្ត្រនយោបាយសកលដែលកំពុងប្រែប្រួលយ៉ាងឆាប់រហ័ស និងស្មុគស្មាញ។ ភាគីទាំងពីរបានឯកភាពលើការប្រើប្រាស់ស្ថានទូត និងស្ថានកុងស៊ុលជាចំណុចស្នូលក្នុងការផ្សព្វផ្សាយសក្តានុពលទេសចរណ៍កម្ពុជា ទៅកាន់ទីផ្សារសក្តានុពល និងទីផ្សារថ្មីៗ។
ការផ្សព្វផ្សាយនឹងផ្តោតលើចំណុចខ្លាំងសំខាន់ៗរបស់កម្ពុជា រួមមាន ទេសចរណ៍វប្បធម៌ និងប្រវត្តិសាស្ត្រ ទេសចរណ៍ធម្មជាតិ និងអេកូទេសចរណ៍ ទេសចរណ៍តំបន់ឆ្នេរ វប្បធម៌ប្រពៃណី សាសនា ម្ហូបអាហារ និង “ស្នាមញញឹមកម្ពុជា” ដែលជាអត្តសញ្ញាណដ៏លេចធ្លោ។ ជាមួយគ្នានេះ ក៏បានលើកឡើងពីការបង្ហាញកាលានុវត្តភាពវិនិយោគក្នុងវិស័យទេសចរណ៍ ដោយផ្អែកលើបរិយាកាសសុខសន្តិភាព និងស្ថេរភាពនយោបាយ ដែលជាមូលដ្ឋានគ្រឹះសម្រាប់កំណើនប្រកបដោយចីរភាព។
កិច្ចសហប្រតិបត្តិការរវាងក្រសួងទាំងពីរ ត្រូវបានចាត់ទុកថាជាជំហានយុទ្ធសាស្ត្រសំខាន់ ក្នុងការបង្រួបបង្រួមការទូតសេដ្ឋកិច្ច និងការទូតទេសចរណ៍ ដើម្បីទាក់ទាញភ្ញៀវទេសចរអន្តរជាតិ ក៏ដូចជាវិនិយោគិនមកកាន់កម្ពុជា កាន់តែច្រើនបន្ថែមទៀត។ ដោយ៖ KPS99TV
