នគរបាលក្រុងតាខ្មៅចុះបង្ក្រាបល្បែងស៊ីសងបញ្ជល់មាន់អនឡាញតែអ្នកលេងនិងម្ចាស់ទីតាំងរត់អស់

ក្រោយទទួលបានសារពីប្រជាពលរដ្ឋស្នើសុំអាជ្ញាធរជួយពិនិត្យមើលល្បែងស៊ីសងអនឡាញខុសច្បាប់ នៅសង្កាត់កំពង់សំណាញ់  នៅថ្ងៃទី០៩ ខែមករា ឆ្នាំ២០២៦ លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានបញ្ជាឱ្យនាយប៉ុស្តិ៍នគរបាលរដ្ឋបាលកំពង់សំណាញ់ ចុះទៅបង្រ្កាបភ្លាមៗ។ ជាលទ្ធផល កម្លាំងនគរបាលប៉ុស្តិ៍កំពង់សំណាញ់ បានបង្រ្កាបទីតាំងលេងល្បែងជល់មានអនឡាញខុសច្បាប់នោះ ដកហូតបានវត្ថុតាងរួមមាន៖ តុធំចំនួន២, តុតូច១, កុំព្យូទ័រ១ និងកៅអីជ័រចំនួន៦ ចំណែកអ្នកលេង និងម្ចាស់ទីតាំងបានរត់គេចខ្លួនបាត់អស់។ អធិការនគរបាលក្រុង បានឱ្យដឹងថា កម្លាំងនគរបាលក្រុង នឹងនៅតែបន្តបង្ក្រាបបទល្មើសល្បែងស៊ីសងគ្រប់ប្រភេទឱ្យដូចភ្លៀងរលឹម និងស្នើពលរដ្ឋចូលរួមសហការផ្ដល់ព័ត៌មានពិតមកកាន់នគរបាល ដោយក្រុមការងារមិនទុកចោលឡើយ នឹងចុះបង្ក្រាបភ្លាមៗតែម្ដង៕ ដោយ៖ ង៉ែត ពិសាន្ត