កម្ពុជាបញ្ជាក់ការបន្តពង្រឹងមិត្តភាពដែកថែបជាមួយចិនក្នុងឱកាសចូលឆ្នាំចិន

តាមរយៈសារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ជូនពរឯកឧត្តម ស៊ី ជីនពីង ប្រធានាធិបតីចិន ក្នុងឱកាសបុណ្យចូលឆ្នាំចិន បានបញ្ជាក់ពីបន្តពង្រឹងចំណងមិត្តភាពដែកថែប និងកិច្ចសហប្រតិបត្តិការត្បូងពេជ្រជាមួយប្រទេសចិនបន្ថែមទៀត។  ក្នុងសារលិខិតចុះថ្ងៃទី១៥ ខែកុម្ភៈ ឆ្នាំ២០២៦ បានបញ្ជាក់ថា ប្រទេសយើងទាំងពីរនឹងចាប់យកកាលានុវត្តភាពថ្មីៗ ដើម្បីពង្រឹងមិត្តភាពដែកថែប និងលើកកម្ពស់កិច្ចសហប្រតិបត្តិការត្បូងពេជ្រទៅកាន់កម្រិតថ្មីមួយទៀត ជាមួយគ្នានឹងជំរុញការកសាងសហគមន៍វាសនារួមកម្ពុជា-ចិន នៅគ្រប់រដូវកាល។ មិនតែប៉ុណ្ណោះ រដ្ឋាភិបាលចិន បាននិងកំពុងគាំទ្រឥតងាករ និងផ្តល់ជំនួយមិនអាចកាត់ថ្លៃបាន ដើម្បីរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច-សង្គមកម្ពុជា។ កម្ពុជា និងចិនមានចំណងមិត្តភាពជាប្រពៃណីដ៏ជិតស្និទ្ធ ដែលត្រូវបានលើកកម្ពស់តាមរយៈទំនុកចិត្ត នយោបាយដ៏ជ្រាលជ្រៅកិច្ចសហប្រតិបត្តិការសេដ្ឋកិច្ចដ៏ខ្លាំងក្លា ការផ្លាស់ប្ដូរវប្បធម៌ដ៏រស់រវើក និងចំណងមិត្តភាពរវាងប្រជាជននិងប្រជាជនដ៏រឹងមាំ៕ ដោយ៖ ង៉ែត ពិសាន្ត