កម្ពុជាបណ្ដេញជនបរទេស២២៥នាក់ ពាក់ព័ន្ធការចូលខុសច្បាប់ ការស្នាក់នៅគ្មានលិខិតឆ្លងដែន និងការងារខុសច្បាប់

ជនបរទេសពាក់ព័ន្ធករណីលួចឆ្លងដែន ស្នាក់នៅដោយគ្មានលិខិតឆ្លងដែន និងធ្វើការងារខុសច្បាប់នៅក្នុងប្រទេសកម្ពុជា ត្រូវបានអគ្គនាយកដ្ឋានអន្តោប្រវេសន៍ បន្តអនុវត្តវិធានការបណ្តេញចេញសរុបចំនួន ២២៥នាក់ (ស្រី ៣៨នាក់) មាន ១៣ សញ្ជាតិ រួមមាន៖ ចិន ហ្គាណា កេនយ៉ា ម៉ាឡេស៊ី ចិនតៃវ៉ាន ប៉ាគីស្ថាន ឥណ្ឌា ឥណ្ឌូនេស៊ី យូហ្គង់ដា ស្រីលង្កា ហ្វីលីពីន វៀតណាម និងហ្ស៊ីមបាប្វេ។ ការបណ្តេញចេញនេះ បានអនុវត្តតាមប៉ុស្តិ៍នគរបាលច្រកទ្វារអាកាសអន្តរជាតិតេជោ នៅថ្ងៃទី១៧-១៨ ខែកុម្ភៈ ឆ្នាំ២០២៦។ ចំពោះការបណ្តេញជនបរទេសជាបន្តបន្ទាប់នេះ អគ្គនាយកដ្ឋានអន្តោប្រវេសន៍ បានឱ្យដឹងថា ជាការអនុវត្តវិធានការច្បាប់យ៉ាងម៉ឺងម៉ាត់ របស់រាជរដ្ឋាភិបាលកម្ពុជា ក្នុងកិច្ចខិតខំប្រឹងប្រែងបោសសម្អាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ដើម្បីធានាសុវត្ថិភាពជូនប្រជាពលរដ្ឋទាំងក្នុងតំបន់ និងសកលលោក ដោយគ្មានការលើកលែងចំពោះមេខ្លោងដែលស្ថិតនៅពីក្រោយនោះឡើយ។ ជាមួយគ្នានេះ អាជ្ញាធរក៏បានជួយសង្គ្រោះជនរងគ្រោះ ដែលត្រូវបានមេខ្លោងបោកបញ្ឆោតឱ្យមកធ្វើការពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា ដោយផ្តល់សេរីភាព និងសម្របសម្រួលឱ្យវិលត្រឡប់ទៅប្រទេសដើមវិញផងដែរ។ ដោយ៖ ប៉ៃ សុឃីម