ក្រសួងទេសចរណ៍ និងរដ្ឋបាលខេត្តព្រះសីហនុ ប្រជុំពិភាក្សា ពិនិត្យ និងធ្វើបច្ចុប្បន្នភាពទិន្នន័យវិនិយោគក្នុងវិស័យទេសចរណ៍

ខេត្តព្រះសីហនុ៖ ថ្នាក់ដឹកនាំក្រសួងទេសចរណ៍ និងរដ្ឋបាលខេត្តព្រះសីហនុ បានបើកកិច្ចប្រជុំពិភាក្សាសំខាន់មួយ ដើម្បីពិនិត្យ និងធ្វើបច្ចុប្បន្នភាពទិន្នន័យវិនិយោគក្នុងវិស័យទេសចរណ៍ ក្នុងភូមិសាស្ត្រខេត្ត នាព្រឹកថ្ងៃទី២៦ ខែកុម្ភៈ ឆ្នាំ២០២៦។ កិច្ចប្រជុំនេះ ដឹកនាំដោយឯកឧត្តម នី ផល្លី រដ្ឋលេខាធិការក្រសួងទេសចរណ៍ និងលោក សាមុត សុធារិទ្ធ អភិបាលរងខេត្តព្រះសីហនុ ព្រមទាំងមានការចូលរួមពីតំណាងមន្ទីរ និងអង្គភាពពាក់ព័ន្ធ នៅសាលប្រជុំសាលាខេត្តព្រះសីហនុ។ ក្នុងជំនួបពិភាក្សានេះ អង្គប្រជុំបានផ្តោតសំខាន់លើចំណុចគន្លឹះ ក្នុងការរៀបចំបញ្ជីសារពើភណ្ឌគម្រោងវិនិយោគទេសចរណ៍ ឱ្យបានច្បាស់លាស់ និងស្របតាមស្ថានភាពជាក់ស្តែងបច្ចុប្បន្ន ព្រមទាំងប្រមូល និងផ្ទៀងផ្ទាត់ទិន្នន័យពាក់ព័ន្ធនឹងគម្រោងវិនិយោគនានា ដើម្បីធានានូវតម្លាភាព និងប្រសិទ្ធភាពក្នុងការគ្រប់គ្រង ក៏ដូចជាការទាក់ទាញវិនិយោគិនមកអភិវឌ្ឍន៍ខេត្តបន្ថែមទៀតផងដែរ៕ ដោយ៖ ប៉ៃ សុឃីម