ធនាគារ វីង ឧបត្ថម្ភថវិកា ៥០ម៉ឺនដុល្លារ ដល់សមាគមសិល្បករខ្មែរ ដើម្បីលើកស្ទួយសិល្បៈ និងវប្បធម៌ជាតិ

ដើម្បីចូលរួមលើកកម្ពស់វិស័យសិល្បៈ និងអភិរក្សមរតកវប្បធម៌ជាតិ ធនាគារ វីង និងសមាគមសិល្បករខ្មែរ បានរៀបចំពិធីប្រគល់-ទទួលថវិកាឧបត្ថម្ភជាផ្លូវការ ដែលជាការបង្ហាញពីការប្តេជ្ញាចិត្តរួមគ្នាក្នុងការគាំទ្រសិល្បករខ្មែរ និងជំរុញការអភិវឌ្ឍសិល្បៈឱ្យកាន់តែរីកចម្រើន។ ក្នុងឱកាសនេះ ធនាគារ វីង បានប្រកាសឧបត្ថម្ភថវិកាចំនួន ១០ម៉ឺនដុល្លារអាមេរិកក្នុងមួយឆ្នាំ រយៈពេល ៥ឆ្នាំជាប់គ្នា ដែលមានទឹកប្រាក់សរុប ៥០ម៉ឺនដុល្លារអាមេរិក។ ថវិកាឧបត្ថម្ភនេះ នឹងត្រូវប្រើប្រាស់សម្រាប់លើកកម្ពស់សុខុមាលភាពរបស់សិល្បករ គាំទ្រការបណ្តុះបណ្តាលសិល្បករជំនាន់ក្រោយ និងបង្កើតឱកាសថ្មីៗ ដើម្បីផ្សព្វផ្សាយ និងនាំយកសិល្បៈខ្មែរទៅកាន់ឆាកអន្តរជាតិ។ កិច្ចសហការនេះ ក៏ជាការរួមចំណែកដ៏មានតម្លៃក្នុងការអភិរក្ស និងថែរក្សាមរតកវប្បធម៌ជាតិ ឱ្យស្ថិតស្ថេរគង់វង្សសម្រាប់កូនខ្មែរគ្រប់ជំនាន់៕ ដោយ៖ ប៉ៃ សុឃីម